लोकमत न्यूज नेटवर्क
हिंगोली : जिल्ह्यात कोरोनाच्या रूग्णसंख्येत दिवसेंदिवस वाढ होत असून, प्रशासनाने संचारबंदी लागू केली आहे. याचा फटका सर्वच क्षेत्रांना बसत आहे. या संचारबंदीचा ट्रॅव्हल्स व्यवसायावरही परिणाम झाला असून, डिझेलचा खर्चही निघत नसल्याचे चित्र आहे. त्यातच ड्रायव्हर, क्लिनरच्या वेतनाचा खर्चही घरातूनच करावा लागत आहे. त्यामुळे हा व्यवसाय फार दिवस चालणार नसल्याच्या प्रतिक्रिया ट्रॅव्हल्स मालकांकडून व्यक्त होत आहेत.
मागील वर्षभरापासून कोरोनाने जिल्ह्यात शिरकाव केला आहे. लॉकडाऊनमुळे तर सर्व व्यवसायच कोलमडून गेले आहेत. मध्यंतरी कोरोना रूग्णांची संख्या कमी झाल्याने व्यवसाय स्थिरावतील, अशी अपेक्षा होती. मात्र, पुन्हा कोरोना हातपाय पसरत असून, याचा फटका सर्वांनाच बसत आहे. यातून ट्रॅव्हल्स व्यवसायही सुटलेला नाही. अगोदरच डिझेलच्या दरात वाढ त्यातच कोरोनामुळे प्रवासी ट्रॅव्हल्सकडे फिरकत नसल्याने फेऱ्यांची संख्याही कमी झाली आहे. यातून डिझेलचा खर्चही निघत नसल्याचे सांगितले जात आहे. त्यामुळे निम्म्या ट्रॅव्हल्स जागेवरच उभ्या आहेत. कोरोनामुळे व्यवसायाला फटका बसला असताना शासनाने कोणत्याही करात सूट दिलेली नाही. त्यामुळे मासिक हप्ते कसे भरावेत, असा प्रश्न उभा राहात आहे. अशीच स्थिती राहिली तर हा व्यवसाय जास्त दिवस चालणार नसल्याच्या प्रतिक्रिया ट्रॅव्हल्स मालकांकडून व्यक्त होत आहेत.
कोरोनाआधी रोज बाहेरगावी जाणाऱ्या ट्रॅव्हल्सची संख्या - १२
सध्याची संख्या - ५
गाडी रूळावर येत होती पण...
लॉकडाऊननंतर कोरोना रूग्णसंख्येत घट झाली होती. त्यामुळे शासनाने टप्प्याटप्प्याने विविध क्षेत्रांवरील बंदी उठवली होती. त्यामुळे ट्रॅव्हल्सच्या व्यवसायाने पुन्हा गती घेतली होती. मात्र, आता कोरोनाचे रूग्ण वाढत असल्याने जिल्हा प्रशासनाने काही निर्बंध घातले आहेत. त्यामुळे पुन्हा हा व्यवसाय कोलमडला आहे.
प्रतिक्रिया...
कोरोनामुळे खासगी बस व्यवसायावर परिणाम झाला आहे. या व्यवसायातून डिझेल टाकायलाही ट्रॅव्हल्स मालकांकडे पैसे उरत नसल्याचे चित्र आहे. शिवाय मासिक हप्ता कसा भरायचा? असा प्रश्न पडतो. शासनानेही कोणत्याच करात सूट दिली नाही. ड्रायव्हर, क्लिनरच्या पगाराचाही प्रश्न असून, अशीच परिस्थिती राहिल्यास हा व्यवसाय संपल्यात जमा आहे.
- ललित खुराणा, ट्रॅव्हल्स मालक
कोरोनामुळे सध्या ट्रॅव्हल्सला प्रवासी मिळत नाहीत. त्यातच डिझेलचे दर वाढले आहेत. ट्रॅव्हल्स रिकाम्या धावत असून, हाती काहीच उरत नसल्याने हा व्यवसाय अडचणीत आला आहे.
- विनोद भारूका, ट्रॅव्हल्स मालक