लॉकडाऊनमध्येही लसीकरणाला गती

हिंगोली : जिल्ह्यात कोरोना लसीकरणाला गती आली आहे. लॉकडाऊन काळात यावर परिणाम होईल, असा अंदाज व्यक्त केला जात होता. मात्र लॉकडाऊनमध्येही ज्येष्ठांसह ४५ वर्षांवरील नागरिक लस घेण्यासाठी पुढे आल्याचे पाहावयास मिळत आहे.

जिल्ह्यात ज्येष्ठ नागरिकांसह ४५ वर्षांवरील नागरिकांचे कोरोना लसीकरण सुरू आहे. यासाठी प्रशासन जनजागृती करीत आहे. आरोग्य विभागाने ठिकठिकाणी लसीकरण केंद्रे उभारून नागरिकांना लस घेण्याचे आवाहन केले आहे. सुरुवातीच्या काळात लसीकरणाचा वेग मंदावला होता. त्यात जिल्ह्यात दोन वेळेस संचारबंदीचा आदेश लागू केला होता. सर्व व्यवहार ठप्प असल्याने लस घेण्यासाठी नागरिक घराबाहेर पडणार नाहीत, असा अंदाज बांधला जात होता. मात्र लॉकडाऊनला न घाबरता या काळातही ज्येष्ठांसह ४५ वर्षांवरील नागरिक लस घेण्यासाठी पुढे आल्याचे दिसून येत आहे. लॉकडाऊनचा लसीकरणावर कोणताही परिणाम न होता उलट या काळात लसीकरणाला गती आल्याचे स्पष्ट झाले आहे.

लसीकरणाला जाताना पोलिसांनी अडवले तर?

कोरोना आजाराला हरविण्यासाठी लस घेणे आवश्यक आहे. सध्या तर कोरोनाने पुन्हा डोके वर काढले आहे. संचारबंदीचे आदेश लागू केले असल्याने पोलीस ठिकठिकाणी लक्ष ठेवून आहेत. मात्र, लस घेण्यासाठी जाणाऱ्या नागरिकांना पोलीस अडवणार नाहीत. अडवले तरी लस घेणारच.

- नारायण शिंदे, लाभार्थी

मागील आठवड्यात लागू केलेल्या संचारबंदी काळात तेवढे कडक निर्बंध नव्हते. पोलिसांनीही कुठे अडवले नाही. आता पोलीस ठिकठिकाणी लक्ष ठेवून आहेत. लसीकरणासाठी जाताना पोलिसांनी अडवले तर त्यांना आधार कार्ड दाखवून लसीकरणासाठी जात असल्याचे सांगणार आहे. परंतु, लस घेणार आहे.

- बाबाराव सुरूशे, लाभार्थी

कोरोनाचा आजार वाढत आहे. त्या अनुषंगाने लस घेणे महत्त्वाचे आहे. लॉकडाऊन राहिले पोलीस जागोजागी तैनात असतात. त्यामुळे लसीकरणावर परिणाम होण्याची शक्यता आहे. त्यासाठी शासनाने पर्याय शोधून लसीकरण कसे करता येईल, यासाठी प्रयत्न करावेत.

- शेख शब्बीर, लाभार्थी

आतापर्यंत जिल्ह्यात झालेले लसीकरण

२७ मार्च - ७९०

२८ मार्च - ००

२९ मार्च - ००

३० मार्च - ६१६

३१ मार्च - १,०९४

१ एप्रिल - ७७८

२ एप्रिल - ३१९

३ एप्रिल - ९९७

४ एप्रिल - ००

५ एप्रिल - १,५१९

६ एप्रिल - १,४४०

७ एप्रिल -

हेल्थकेअर वर्कर - ८,५५०

फ्रंटलाइन वर्कर - ५,४६२

ज्येष्ठ नागरिक - १९,२३८

४५ वर्षांपेक्षा जास्त - ६,८६०