पोलीस कर्मचाऱ्याची कॉलर पकडली

येथील केटीएस जिल्हा सामान्य रूग्णालयात गुंडाचा प्रवेश व त्यांच्याकडून होत असलेला अतिरेक ही काही नवी बाब नाही.

गोंदिया : येथील केटीएस जिल्हा सामान्य रूग्णालयात गुंडाचा प्रवेश व त्यांच्याकडून होत असलेला अतिरेक ही काही नवी बाब नाही. याचीच प्रचिती आणखी एका घटनेतून आली जेव्हा काही तरूणांनी ड्यूटीवर असलेल्या पोलीस कर्मचाऱ्याची कॉलर पकडली. १८ डिसेंबर रोजी रात्री ९ वाजतादरम्यान ही घटना घडली. शिवाय रूग्णालयात आलेल्या रूग्णांचे पाकीटही मारण्यात आले आहे.
प्राप्त माहितीनुसार, १८ डिसेंबर रोजी रात्री ९ वाजता दरम्यान काही तरूण रूग्णालयात एका रूग्णाला बघण्यास आले होते. परत जाताना या तरूणांनी आपली मोटारसायकल एका रूग्णवाहीकेपुढे उभी ठेवली. या रूग्णवाहीकेतून एका रूग्णाला हलविले जाणार होते मात्र हे तरूण मोटारसायकल हटविण्यास राजी नव्हते.
यावर ड्यूटीवर असलेल्या पोलीस कर्मचारी बालू उद्धव सानप (३१) याने त्या तरूणांना मोटारसायकल हटविण्यास सांगीतले. मात्रत्या तरूणांनी रागाच्या भरात सानप यांचा कॉलर पकडून त्यांनी धमकी दिली व निघून गेले.
या प्रकरणी शहर पोलिसांनी भादंविच्या कलम १४३, १४७, १४९, ३५२, ५०४, ५०६ अंतर्गत प्रकरण नोंद केले आहे. सांगीतले जाते की, या तरूणांत कृष्णपुरा वॉर्ड निवासी खुशाल सतदेवे, विक्की भोयर, संजय गजभिये, अमर गजभिये व इतर तीन-चार तरूणांचा समावेश आहे. यातील काही तरूण गुन्ह्यांत लिप्त असून एकाला आजन्म कारावासाची शिक्षा झाली असून तो सध्या सुटीवर बाहेर आल्याचीही माहिती आहे. (शहर प्रतिनिधी)
अनेकांची पाकिटे मारली
ही घटना घडते न घडते तोच रूग्णालयात तिकीट काढण्यासाठी रांगेत उभे निर्मल रामअवतार अग्रवाल (३१,रा.गणेशनगर) यांना धक्का देत त्यांच्या खिशातून एकाने पाकीट मारला व साथीदाराला दिला. १९ डिसेंबर रोजी सकाळी ११.३० वाजता दरम्यान घडलेल्या या घटनेत पाकीट मारणाऱ्याचा साथीदार तर पळून गेला मात्र निर्मल यांनी पाकीट काढणाऱ्यास पकडून घेतले. पोलिसांनी गुन्हा नोंद केला असून हे कृत्य करणारे जय करियार व आकाश टेंभेकर (रा.गौतमनगर) हे तरूण आहेत. तेथे उपस्थित असलेल्यांनी सांगीतले की, या दोघांनी आणखीही काहींचे पाकीट मारले असून रूग्णालयात ते सतत वावरत असतात. पोलिसांनी भादंविच्या कलम ३९२,३४ अंतर्गत गुन्हा नोंद केला आहे.