लोकमत न्यूज नेटवर्कगोंदिया : ‘ब्रेक द चेन’ अंतर्गत राज्य शासनाने पाॅझिटिव्हीटी रेट आणि ऑक्सिजन बेडची उपलब्ध या आधारावर राज्यातील जिल्ह्याचे पाच स्तर करून त्या जिल्ह्यांमध्ये अनेक लॉक करण्याची प्रक्रिया सुरू केली आहे. दर आठवड्याला जिल्ह्यातील कोरोना परिस्थितीचा आढावा घेऊन निर्बंध शिथिल किंवा कडक करण्याबाबत निर्णय घेतला जाणार आहे. राज्य शासनाने शनिवारी (दि.११) यासंदर्भातील आकडेवारी जाहीर केली त्यात गोंदिया जिल्ह्याचा पॉझिटिव्हिटी रेट ०.८३ टक्के असून तो राज्यात सर्वांत कमी आहे.गोंदिया जिल्ह्याचा अनलॉकच्या पहिल्याच स्तरात समावेश आहे. त्यामुळे जिल्ह्यातील सर्वच निर्बंध शिथिल करण्यात आले आहे. परिणामी मागील पाच दिवसांपासून सर्वच व्यवहारांची गाडी रूळावर आली आहे. त्यामुळे जिल्हावासीयांना सुद्धा दिलासा मिळाला आहे. जिल्ह्यात कोरोनाचा संसर्ग बऱ्याच प्रमाणात आटोक्यात असून कोरोनाची दुसरी लाट ओसरल्याचे दिलासादायक चित्र आहे. आठवडाभरात जिल्ह्यात कोरोना संसर्गाच्या अनुषंगाने एकूण २०७५७ जणांचे स्वॅब नमुने तपासणी करण्यात आले. त्यात १७३ जण पॉझिटिव्ह आले असून त्याचा पॉझिटिव्हिटी रेट हा ०.८३ टक्के आहे तर राज्यातील इतर जिल्ह्यांचा पॉझिटिव्हिटी रेट १ टक्क्यांहून अधिकच आहे. त्यामुळे ही जिल्हावासीयांसाठी निश्चितच दिलासादायक बाब आहे तर केवळ १.८ टक्के ऑक्सिजन बेड भरले असून मोठ्या प्रमाणावर बेड रिकामे आहे. हीसुद्धा जिल्हावासीयांच्या दृष्टीने समाधानकारक बाब आहे. जिल्ह्याचा पहिल्याचा स्तरात समावेश असल्याने सर्वच व्यवहार सुरळीत सुरू आहे. त्यामुळे जिल्ह्यातील निर्बंध ‘जैसे थे’ राहणार आहेत.
पुन्हा लॉकडाऊनची वेळ नकोच - गोंदिया जिल्ह्याचा पॉझिटिव्हिटी रेट सातत्याने कमी होत आहे ही निश्चितच जिल्हावासीयांच्या दृष्टीने दिलासादायक बाब आहे. जिल्ह्यावासीयांनी कोरोना प्रतिबंधात्मक नियमांचे पालन आणि योग्य खबरदारी घेतल्यास जिल्ह्यावर पुन्हा लॉकडाऊनची वेळ येणार नाही. त्यामुळे नागरिकांनी स्वत:ची आणि कुटुंबीयांची काळजी घ्यावी.
कोरोनाची दुसरी लाट आता पूर्णपणे ओसरली आहे. कोरोनाचा पॉझिटिव्हिटी रेटसुद्धा राज्यात सर्वांत कमी आहे. त्याचे श्रेय जिल्ह्यातील जनतेलाच जाते. जशी काळजी जिल्ह्यावासीय आता घेत आहेत तशीच काळजी यापुढे घेत राहिल्यास जिल्हा निश्चितच लवकरच कोरोनामुक्त होईल. - राजेश खवले, जिल्हाधिकारी