आसोलीत संपूर्ण दारूबंदीची मागणी

नवरगाव खुर्दजवळील पाच गावांतील सरपंच, उपसरपंच, ग्रा.पं. सदस्य व तंमुसच्या पदाधिकाऱ्यांची सभा नुकतीच पार पडली. या सभेत विविध मागण्यांसह आसोली येथे खुलेआम विक्री होणाऱ्या दारूवर पूर्णत:

गोंदिया : नवरगाव खुर्दजवळील पाच गावांतील सरपंच, उपसरपंच, ग्रा.पं. सदस्य व तंमुसच्या पदाधिकाऱ्यांची सभा नुकतीच पार पडली. या सभेत विविध मागण्यांसह आसोली येथे खुलेआम विक्री होणाऱ्या दारूवर पूर्णत: बंदी घालण्याची मागणी करण्यात आली.
यावेळी प्रामुख्याने नवरगावचे सरपंच दुर्गा मेंढे, आसोली तंमुसचे अध्यक्ष योगेश गायधने, दतोराचे सरपंच सूरजलाल महारवाडे, नवरगावकलकचे उपसरपंच अरूण गडपायले, दतोराचे उपसरपंच भोजराज चुटे, तंमुसचे अध्यक्ष भागचंद हरिणखेडे, पोलीस पाटील विजेंद्र डहाट, इर्रीचे तंमुसचे अध्यक्ष मूलचंद चौधरी, सरपंच अनिता पटले, मोरवाहीचे पोलीस पाटील विनोद ठाकूर आदी उपस्थित होते.
सभेत नाग विदर्भ समितीचे जिल्हाध्यक्ष छैलबिहारी अग्रवाल, संघटक अजय गौर, मुद्रिकाप्रसाद तिवारी यांनी वीजेच्या समस्या, पाणी समस्या, शेतकरी आत्महत्या, विदर्भातील खनिजांची लूट व महाराष्ट्रात विदर्भासोबत वेगळा व्यवहार यावर माहिती सांगितली. तसेच वेगळ्या विदर्भाची मागणी केली. यानंतर आसोली येथे खुलेआम होणाऱ्या दारूविक्रीमुळे विद्यार्थी व ग्रामीण महिलांना अनेक समस्या सहन कराव्या लागतात. तसेच आसोली येथे पूर्णत: दारूबंदी करण्यासाठी तेथील लोकांना विश्वासात घेवून नाग विदर्भ समिती आंदोलनकारी संघर्ष करणार असल्याचे सांगण्यात आले. सदर सभेचे आयोजन नाग विदर्भ समितीचे ग्रामीण महिला अध्यक्ष उषा मेश्राम यांच्या पुढाकाराने करण्यात आले. सभेच्या अध्यक्षस्थानी अ‍ॅड. रोकडे होते. संचालन लखन मेंढे यांनी केले. कार्यक्रमासाठी नाग विदर्भ समितीचे जिल्हा महासचिव रमेश ढोमणे, उपाध्यक्ष बलदेव सोनेवाने, हामीद अली सिद्दीकी, भेलावे, अग्रवाल आदींनी सहकार्य केले. (प्रतिनिधी)