१२१ मंजूर कामे : रस्ते व नाल्यांची ९२ कामे पूर्णत्वाकडे
देवानंद शहारे - गोंदिया '
शहरातील नागरिकांना जीर्ण रस्ते व घाणीपासून मुक्तता मिळावी तसेच शहराच्या सौंदर्यात भर पडावी या उद्देशाने शहरात सात कोटी रूपयांच्या खर्चातून रस्ते व नाल्यांचे बांधकाम तसेच इतर विकासकार्यांना मोठ्या प्रमाणात सुरूवात झाली आहे. नगर परिषद प्रशासन या सर्व कामांना १५ जूनच्या आधी पूर्ण करण्याच्या प्रयत्नात आहे. पावसाळा तोंडावर असताना ही कामे वेळेत पूर्ण करण्याचे आव्हान न.प.च्या यंत्रणेसमोर राहणार आहे. या विकास कार्यासाठी शासनाच्या विविध योजनांच्या अंतर्गत निधी उपलब्ध करण्यात आला आहे. काही कामे पूर्ण झाली आहेत, तर उर्वरित बांधकाम प्रगतीपथावर आहे. हे कार्य लवकरच पूर्णत्वास जाण्याची शक्यता व्यक्त केली जात आहे. लोकसभा निवडणुकीच्यादरम्यान आचारसंहितेमुळे निविदा काढता न आल्यामुळे काही कार्य सुरू होवू शकले नव्हते. ते कार्य आता सुरू झाले आहेत. नगर परिषदेचे मुख्याधिकारी सुमंत मोरे यांनी दिलेल्या माहितीनुसार, शहरात रस्ता अनुदान निधीतून ३१ कार्य केले जात आहेत. यात विविध वार्डांत रस्त्यांचे डांबरीकरण व सिमेंट रस्त्यांच्या बांधकामाचा समावेश आहे. नगरोत्थान निधी अंतर्गत २५ कार्य केले जात आहेत. यात सिमेंट रस्ते, पक्क्या नाल्या, व्यापार संकूल, शालेय इमारतींच्या बांधकामांचा समावेश आहे. बीआरजीएफ निधीतून २३ विकास कार्य केले जात आहेत. दलितोध्दार निधीतून चार व दलित वस्ती सुधार योजनेंतर्गत १७ कार्य केले जात आहेत. या कार्यांत सिमेंट रस्ते, नाल्यांचे बांधकाम व रस्त्यांच्या डांबरीकरण कार्यांचा समावेश आहे. वैशिष्ट्यपूर्ण निधीतून एकूण पाच कार्यांना मंजुरी मिळाली आहे. यापैकी तीन कार्य अद्यापही सुरू झाले नाही. या निधी अंतर्गत एस.एस. गर्ल्स हायस्कूलची सुरक्षा भिंत व सिंधी कॉलनीत रावणदहन मैदानाच्या सौंदर्यीकरणाचे कार्य सुरू करण्यात आले आहे. अतिवृष्टी दिलासा निधीतून रस्ता बांधकामाचे १४ कार्य मंजूर करण्यात आले आहेत. यापैकी १० कार्य अद्यापही सुरू करण्यात आले नाही. अल्पसंख्यांक कल्याण निधीच्या अंतजर्गत स्थानिक ईदगाह परिसरात २१.७७ लाख रूपयांच्या खर्चाने पेविंग ब्लॉक लावण्याचे कार्य सुरू आहे, हे कार्य लवकरच पूर्णत्वास जाणार आहे. मुख्याधिकारी मोरे यांनी सांगितले की, शहरात सुरू असलेले विकास कार्य नगर परिषदेच्या बांधकाम विभागासह शासनाच्या बांधकाम विभागाद्वारेसुद्धा करण्यात येत आहेत. एकूण १२१ मंजूर केलेल्या विकास कार्यांपैकी ९२ कार्यांना सुरूवात करण्यात आली आहे. यापैकी अधिक कार्य पूर्ण झालेली आहेत. उर्वरित कार्य १५ जूनपर्यंत पूर्ण करण्यात येतील. २९ कामांना मात्र अद्यापही सुरूवात करण्यात आलेली नाही. गुरूनानक गेट ते मुर्री रेल्वे चौकीपर्यंत रस्ता डांबरीकरणाचे प्रस्तावित कार्य रद्द करण्यात आले आहे. या बांधकामावर १४.३६ लाख रूपये खर्च होणार होते. ही सर्व कामे पूर्ण झाल्यावर शहरातील नागरिकांच्या स्वच्छ व उत्तम रस्त्यांच्या अपेक्षा पूर्ण होतील.