गोव्यातही यंदा कमी पावसाचे संकेत; दरवर्षी पडतो ११८ इंच पाऊस

या अंदाजानुसार, यंदा देशात पावसाचे एकूण प्रमाण सरासरीपेक्षा कमी राहण्याची शक्यता आहे.

लोकमत न्यूज नेटवर्क, पणजी: भारतीय हवामान विभागाने २०२६ सालातील नैऋत्य मान्सूनचा पहिला दीर्घकालीन अंदाज आज प्रसिद्ध केला आहे.

या अंदाजानुसार, यंदा देशात पावसाचे एकूण प्रमाण सरासरीपेक्षा कमी राहण्याची शक्यता आहे. मात्र, गोव्याचा समावेश असलेल्या दक्षिण द्वीपकल्प आणि पश्चिम किनारपट्टीच्या काही भागांत पाऊस समाधानकारक राहण्याचे संकेत मिळाले आहेत.

हवामान विभागाने दिलेल्या माहितीनुसार, जून ते सप्टेंबर या चार महिन्यांच्या कालावधीत देशात सरासरीच्या ९२ टक्के पाऊस पडण्याची शक्यता आहे. यामध्ये ५ टक्के कमी-अधिक फरकाची शक्यता वर्तवण्यात आली आहे. १९७१ ते २०२० या काळातील पावसाची सरासरी ८७सेंटीमीटर इतकी असून, यंदाचे प्रमाण ९० ते ९५ टक्क्यांच्या दरम्यान राहण्याचा अंदाज आहे.

सध्या प्रशांत महासागरात असलेल्या 'ला निना'ची स्थिती बदलून आता ती तटस्थ होत आहे. हवामान खाते मे २०२६ च्या शेवटच्या आठवड्यात पावसाचा सुधारित आणि अधिक सविस्तर अंदाज जाहीर करणार आहे. त्यावेळी गोव्याच्या आणि इतर राज्यांच्या पावसाबाबत अधिक स्पष्ट चित्र समोर येईल.

दरवर्षी पडतो ११८ इंच पाऊस

गोव्यात दरवर्षी होणाऱ्या पावसाचे प्रमाण हे देशातील इतर राज्यांच्या तुलनेत सर्वाधिक मानले जाते. दरवर्षी सरासरी ११८ इंच इतका पाऊस पडतो.

राज्याच्या किनारपट्टीच्या भागापेक्षा सह्याद्रीच्या घाटमाथ्यावर, विशेषतः सत्तरी, सांगे आणि काणकोण यांसारख्या अंतर्गत तालुक्यांमध्ये पावसाचे प्रमाण अधिक असते. तेथे अनेकदा वार्षिक सरासरी ३५० सेंटीमीटरच्या पुढेही जाते.

हवामान विभागाच्या अंदाजानुसार उत्तर-पश्चिम भारत, ईशान्य भारत आणि दक्षिण द्वीपकल्पीय भागात पाऊस सामान्य ते सामान्यपेक्षा अधिक हण्याची शक्यता आहे. गोवा दक्षिण द्वीपकल्पीय क्षेत्राच्या, पश्चिम किनारपट्टीजवळ असल्याने, राज्यात पावसाचे प्रमाण देशाच्या सरासरीच्या तुलनेत चांगले राहण्याचे संकेत आहेत.