हृदयद्रावक! श्लोक कसा आहे विचारत बहिणीने सोडला प्राण; बुडणाऱ्या भावाला वाचवायला गेलेल्या सानिकाचाही मृत्यू

या घटनेमुळे कुडचडेत दुःखाची छाया पसरली.

लोकमत न्यूज नेटवर्क, कुडचडे : खणगिणी-बेतुल येथे ओहोळात बुडणारा भाऊ, श्लोक नाईक (१०) याला वाचवताना जखमी झालेली बहीण सानिका नाईक (१७) हिचादेखील उपचारादरम्यान मृत्यू झाला. दोघेही आपल्या कुटुंबीयांसह ओहोळावर आंघोळीसाठी गेले होते. वस्तवाडा-कुडचडे येथील नाईक कुटुंबीय सहलीसाठी खणगिणी येथे गेले होते. त्यावेळी ही दुर्दैवी घटना घडली. या घटनेमुळे कुडचडेत दुःखाची छाया पसरली.

रविवारी, दि. १२ रोजी दक्षिण गोव्यात वीज पुरवठा खंडित असल्याने वस्तवाडा येथील श्लोक व सानिका हे आई, आजी, मावशीबरोबर खणगिणी येथे पिकनिकला गेले. ओहोळात आंघोळ करताना श्लोकचा पाय घसरून तो पाण्यात बुडाला. त्याला वाचवायला सानिकाने उडी मारली. यावेळी ती जखमी झाली. तेथील लोकांनी दोघांनाही बाहेर काढले.

ओहोळात बुडून लहानग्या श्लोक याचा रविवारी दुपारीच मृत्यू झाला. तर सानिका गोमेकॉमध्ये मृत्यूशी झुंज देत होती. रविवारच्या सुट्टीचा आनंद घेण्यासाठी नाईक कुटुंब खणगिणी येथे गेले. ओहोळात त्यांनी आंघोळीचा आनंद घेतला. मात्र, नदीला आलेल्या भरतीमुळे ओहोळातील पाण्याचा प्रवाह वाढला. यावेळी श्लोक बुडू लागल्याचे लक्षात येताच सानिकाने भावासाठी जीवाची बाजी लावली. मात्र, तिचे प्रयत्न अपुरे पडले. श्लोकला पाण्याबाहेर काढले तेव्हा त्याचा मृत्यू झाला होता. तर सानिका बेशुद्ध होती. त्यामुळे तिला वाचविण्यासाठी डॉक्टरांनी प्रयत्न केले. मात्र, तिचाही मृत्यू झाला. अवघ्या २४ तासांत दोन मुलांचा मृत्यू झाल्याने नाईक कुटुंबावर दुःखाचा डोंगर कोसळला आहे.

अखेरच्या क्षणीही होती भावाची काळजी

सानिका व श्लोक या दोन्ही भावंडांमध्ये अत्यंत जिव्हाळा होता. जेव्हा सानिका अंतिम घटका मोजत होती, तेव्हासुद्धा तिने श्लोक कसा आहे? त्याला काही झालं नाही ना अशी विचारणा करतच तिने आपला प्राण सोडला. सानिकाच्या आईने केलेल्या आक्रोशाने सर्वांचे मन हेलावून गेले. बाग-कुडचडे स्मशानभूमीत दोघांवरही अंत्यसंस्कार करण्यात आले.

मनमिळावू मुले हरपली

वस्तवाडा येथे सानिका, श्लोक त्यांचे वडील संजय, आई संजना, दीड वर्षाचा भाऊ समर्थ व आजी शुभांगी नाईक राहातात. वडील संजय नाईक हे कष्टकरी आहेत. काबाडकष्ट करून त्यांनी मुलांना शिकविले. मोठी मुलगी सानिका यंदा ११ वीची परीक्षा पास होऊन बारावीत गेली होती तर श्लोक पाचवी पास झाला होता. श्लोकला खेळाची व कला क्षेत्राची आवड होती. दोघेही मनमिळावू व हुशार होते. दोन्ही मुलांचा मृत्यू झाल्याने कुडचडेतील अनेकांना मोठा धक्का बसला.

दोघांना बाळ्ळीच्या आरोग्य केंद्रत नेले असता तेथे श्लोक मृत झाल्याचे डॉक्टरांनी सांगितले. सानिकाची प्रकृती गंभीर असल्याने तिला तातडीने बांबोळी येथे गोमेकॉत दाखल केले. मात्र, रविवारी रात्री उशीरा तिचाही उपचारादरम्यान मृत्यू झाला.