समाजऋण फेडण्यासाठी कटिबध्द

ज्या समाजाने मला आपल्या कुशीत रूढी, परंपरा व संस्कारात वाढविले, केवळ मोठेच केले नाही तर राज्याच्या मंत्रिपदापर्यंत पोहोचविले. त्या समाजाचे ऋण फेडण्यासाठी मी कायम कटिबध्द राहील,

आर्यवैश्य समाज मेळावा : सुधीर मुनगंटीवार यांचे प्रतिपादन
चामोर्शी : ज्या समाजाने मला आपल्या कुशीत रूढी, परंपरा व संस्कारात वाढविले, केवळ मोठेच केले नाही तर राज्याच्या मंत्रिपदापर्यंत पोहोचविले. त्या समाजाचे ऋण फेडण्यासाठी मी कायम कटिबध्द राहील, अशी ग्वाही राज्याचे वित्त व नियोजन व वनमंत्री सुधीर मुनगंटीवार यांनी दिली.
आर्यवैश्य समाज मंडळ चामोर्शीच्यावतीने आयोजित उपवर-वधू परिचय मेळाव्यात ते शनिवारी बोलत होते. या मेळाव्याचे उद्घाटन ना. सुधीर मुनगंटीवार यांच्या हस्ते झाले. याप्रसंगी चंद्रपूरच्या महापौर राखी कंचर्लावार, कन्यका नागरी सहकारी बँकेचे अध्यक्ष डॉ. प्रफुल भास्करवार, नानाजी उपगन्लावार, गडचिरोली जिल्हा परिषदेचे बांधकाम सभापती अतुल गण्यारपवार, समाजाचे प्रदेश अध्यक्ष गणेश चक्करवार, मेळाव्याच्या आयोजन समितीचे अध्यक्ष मनोज पालारपवार, प्र. सो. गुंडावार, सचिव राजू कोत्तावार, जिल्हा परिषदेचे माजी अध्यक्ष रविंद्र ओल्लालवार, महेंद्र बुर्लावार, साधनाताई गण्यारपवार, प्रकाश शिवणीवार आदी उपस्थित होते. या मेळाव्याच्या अध्यक्षस्थानी तळोधीचे ज्येष्ठ समाज नेते अण्णासाहेब पोशेट्टीवार होते. चामोर्शी येथील साईमंदिर परिसरात मेळावा घेण्यात आला. या मेळाव्यात १५१ वर व ६१ वधुंची नोंदणी करण्यात आली. याप्रसंगी सुधीर मुनगंटीवार यांचा समाजाच्यावतीने सत्कार करण्यात आला. संचालन संध्या विरमलवार, प्रास्ताविक मनोज पालारपवार व आभार अनिल चिलवेलवार यांनी मानले. (तालुका प्रतिनिधी)