कुरखेडा : शहरातील सती नदी घाटावर वसलेल्या प्रभाग क्र. १७ वरील लोकवस्तीला दरवर्षी पुराचा फटका बसत असल्याने शासनाकडून त्यांना सुरक्षितस्थळी शासकीय जागेत भूखंड उपलब्ध करून देण्यात आले आहेत. मात्र, सदर जागेची मोजणी करण्याकरिता भूमापन अभिलेख विभागाकडून ४ हजार ५०० रुपयांची मागणी करण्यात येत आहे. येथील बहुसंख्य नागरिक गोरगरीब वर्गातील असल्याने ही रक्कम ते भरू शकत नाहीत. त्यामुळे येथील लाभार्थांची भूखंडाची मोजणी मोफत करून देण्यात यावी, अशी मागणी येथील नागरिकांनी पालकमंत्री एकनाथ शिंदे यांच्याकडे निवेदनाद्वारे केली आहे.
निवेदनात म्हटले आहे की, दरवर्षी पुराच्या पाण्याचा फटका सहन करणाऱ्या येथील ९९ कुटुंबांना सन २०१०ला शासनाच्या वतीने गांधी वाॅर्डालगत असलेल्या खुल्या शासकीय जागेत भूखंड उपलब्ध करून देण्यात आले आहेत. मात्र, यातील बहुसंख्य कुटुंबांची आर्थिक परिस्थिती बेताची असल्याने भूखंड उपलब्ध होऊनही घराचे बांधकाम करता आले नाही. मात्र, अलिकडेच यापैकी काही लाभार्थीना नगर पंचायतीच्या वतीने शासकीय घरकूल योजनेचा लाभ मंजूर करण्यात आला आहे. मात्र, या भूखंडावर बांधकाम करण्यापूर्वी भूमापन अभिलेख विभागाकडून भूखंडाची मोजणी व क शीट या दस्तऐवजाची गरज आहे. मात्र, सदर मोजणीसाठी शुल्क लागत असल्याने येथील गरीब जनतेची पंचाईत झाली आहे. त्यामुळे त्यांची आर्थिक परिस्थिती लक्षात घेत ही मोजणी शासनाकडून मोफत करण्यात यावी, अशी मागणी पालकमंत्री एकनाथ शिंदे यांच्याकडे करण्यात आली.
निवेदन देताना शिवसेनेचे माजी उपजिल्हा प्रमुख डॉ. महेंद्रकुमार मोहबंसी, कामगार सेनेचे माजी तालुकाप्रमुख डॉ. अनिल उईके, सुकलदास माकडे, उद्धव आठवले, किशन कंगाली, रतन मुत्तेलवार, राजू पिलेवार, रामदास मस्के, जिजा बारसागडे, पांडुरंग चंदनखेडे, मनोहर उईके, कुसूम धुळसे, सविता संगेल, शांता राऊत, मंगला बोरसरे, जगन वारवाडे, मारोती पारडवारी, अरविंद मेश्राम, जगन्नाथ मेश्राम, प्रेमलाल झरबले, मारोती चंदनखेडे, अहेमद पठान, अहेमद कुरेशी, संजय कोटागंले, दिलीप काळबांधे, जनार्दन तुलावी, अली शेख, कादर शेख, शफी शेख, वामन बावनकर, जावेद शेख, शांता बावनकर तसेच शिवसेनेचे माजी जिल्हाप्रमुख सुरेंद्रसिंह चंदेल उपस्थित हाेते.