गडचिरोली: भाैतिक प्रगती करताना पर्यावरण व वसुंधरेची हानी हाेणार नाही. याची खबरदारी प्रत्येक नागरिकाने घेतली पाहीजे, असे प्रतिपादन पालकमंत्री एकनाथ शिंदे यांनी केले.
राज्य शासनाच्या पर्यावरण व वातावरणीय बदल विभागाच्या वतीने माझी वसुंधरा या अभियानांतर्गत जिल्हाधिकारी कार्यालयातील कर्मचाऱ्यांना शुक्रवारी शपथ देण्यात आली. याप्रसंगी पालकमंत्र्यानी ऑनलाईन मार्गदर्शन केले. जिल्हयात नगरपंचायत, पंचायत समिती, जिल्हा परिषद यासह जिल्हाधिकारी कार्यालयात हरित शपथ घेण्याचा कार्यक्रम आयोजित करण्यात आला होता. यावेळी जिल्हाधिकारी दीपक सिंगला, मुख्य कार्यकारी अधिकारी कुमार आशिर्वाद , निवासी उपजिल्हाधिकारी जी.एम. तळपादेे, उपजिल्हाधिकारी धनाजी पाटील, कल्पना निळ व इतर विभागाचे विभाग प्रमुख उपस्थित होते.
यावेळी पालकमंत्री म्हणाले, हे अभियान वातावरणीय बदलांमूळे झालेले नुकसान भरुन काढण्यास मदत करेल. वातावरणीय बदल हे देशापुरते मर्यादित नसून संपूर्ण जगाला त्याने ग्रासले आहे. आपण भौतिक प्रगती साधत असताना आपल्या वसुंधरेचे अस्तित्व धोक्यात येत आहे. निसर्गाकडून घेत असताना त्याला आपण देणेही लागतो ही भावना प्रत्येकाच्या मनात रुजली पाहिजे आणि याच आधारावर माझी वसुंधरा अभियानाची आखणी करण्यात आली आहे. निसर्गाच्या, पर्यावरणाच्या रक्षणासाठी लोक एकत्र आले पाहिजेत. अभियान ही लोकचळवळ उभी करण्यासाठीचा एक मार्ग आहे. परंतु ही चळवळ शासनाच्या किंवा सरकारपूरती मर्यादित राहता कामा नये. यामध्ये प्रत्येक व्यक्तीने आपले कर्तव्य म्हणून प्रत्यक्ष सहभाग नोंदविणे आवश्यक असल्याचे ते पुढे म्हणाले.