उद्योजकांना क्षमता वृद्धीचे प्रशिक्षण

जिल्हा उद्योग केंद्र गडचिरोली यांच्या पुढाकाराने राईस मिल क्लस्टरच्या उद्योजकांना क्षमता वृद्धीचे प्रशिक्षण शुक्रवारी देण्यात आले.

गडचिरोली : जिल्हा उद्योग केंद्र गडचिरोली यांच्या पुढाकाराने राईस मिल क्लस्टरच्या उद्योजकांना क्षमता वृद्धीचे प्रशिक्षण शुक्रवारी देण्यात आले.
गडचिरोली जिल्ह्यात धानाचे प्रचंड प्रमाणात उत्पादन होते. त्यामुळे राईस मिलचा व्यवसाय चांगल्या पद्धतीने चालू शकतो. काही उद्योजक हा व्यवसाय मागील कित्येक वर्षांपासून करीत आहेत. काही व्यापारी स्वत:च धान खरेदी करून त्याची मिलिंग केल्यानंतर विक्री करतात तर काही राईस मिलमालक घरगुती धान पिसाई करून देतात.
चामोर्शी येथील उद्योजकांनी राज्यातील पहिले राईस मिल क्लस्टर निर्माण केले आहे. या क्लस्टरमध्ये सहभागी झालेल्या उद्योजकांना जिल्हा मध्यवर्ती सहकारी बँकेच्या सभागृहात प्रशिक्षण देण्यात आले. या कार्यशाळेला ५० उद्योजक उपस्थित होते. यावेळी जिल्हा अग्रणी बँकेचे व्यवस्थापक डी. के. सिल्लारे, नाबार्डचे अधिकारी क्रिष्णा कोल्हे, केंद्राच्या सूक्ष्म, लघु, मध्यम मंत्रालयाचे सहाय्यक संचालक कंदारे, जिल्हा कृषी विज्ञान केंद्राचे संदीप कराडे, एस. पी. कोलते आदी उपस्थित होते.
या सर्वच मान्यवरांनी उद्योजकांना मार्गदर्शन केले. गडचिरोली जिल्ह्यात मोठ्या प्रमाणात धानाचे उत्पादन घेतले जात असल्याने राईस मिल उद्योगाला चांगली संधी असल्याने हा अत्यंत चांगला उद्योग असल्याचे मार्गदर्शन केले. उद्योग स्थापन करण्यासाठी कोणत्या संस्थेकडून कर्ज उपलब्ध होईल, तांदळाची असलेली बाजारपेठ व उद्योगाबद्दलची माहिती पॉवर पार्इंट प्रेझेंटेशनद्वारे समजावून सांगितली. राईस मिल ट्रस्टचे उद्योजक रवींद्र ओल्लालवार यांनी उपस्थितांचे आभार मानले. कार्यशाळा यशस्वी करण्यासाठी जिल्हा उद्योग केंद्राच्या कर्मचाऱ्यांनी सहकार्य केले. अशा प्रकारच्या कार्यशाळांमुळे राईसमिलचा उद्योग वाढण्यास फार मोठी मदत होईल, अशी अपेक्षा अधिकाऱ्यांनी व्यक्त केली. (प्रतिनिधी)