वीकेंड लॉकडाऊनच्या दुसऱ्या दिवशी प्रतिसाद

कोरोनाची दुसरी लाट

शहरासह जिल्ह्यात आणि राज्यात कोरोनाची दुसरी लाट आलेली आहे. ही लाट भयंकर असून, धुळ्यासारख्या ठिकाणी रुग्णांची संख्या दिवसेंदिवस वाढताना दिसून येत आहे. गेल्या काही दिवसांत बाधित मृतांची संख्याही वाढू लागल्याने स्थानिक प्रशासनही चिंतेत सापडले. राज्य शासनाने कडक निर्बंध घालत वीकेंड लॉकडाऊन करणार असल्याचे आधीच जाहीर केले होते. त्यानुसार, प्रशासनाने लॉकडाऊनची कडक अंमलबजावणी करण्यासाठी कंबर कसली.

व्यापाऱ्यांकडूनही प्रतिसाद

कोरोनाच्या पार्श्वभूमीवर राज्यशासनाने निर्बंध लावल्यानंतर स्थानिक पातळीवर वीकेंड लागू करण्यात आला. यात सर्वाधिक व्यापाऱ्यांची भूमिका निर्णायक ठरली़ प्रशासनाने आवाहन केल्यानुसार, लहान-मोठ्या सर्वच व्यापाऱ्यांनी आपापली प्रतिष्ठाने बंदच ठेवली होती. त्यात उत्तम प्रतिसाद मिळाला. पहिल्या दिवसाप्रमाणे दुसऱ्या दिवशीही व्यापाऱ्यांनी प्रशासनाच्या आवाहनाला प्रतिसाद दिल्याने सर्वच व्यवहार ठप्प होती.

दुसऱ्या दिवशीही रस्त्यावर शुकशुकाट

मेडिकल स्टोअर्स, कृषी संबंधित दुकाने वगळता सर्वच व्यवसाय बंद असल्याने, मुख्य बाजारपेठ असलेल्या आग्रा रोडवर, पाचकंदिल परिसरात शुकशुकाट दिसून आला. सर्वत्र बंद असल्याने बारा पत्थर, महात्मा गांधी पुतळा, अग्रसेन चौक, साक्री रोड, दत्त मंदिर परिसर, वाडीभोकर रोड, पारोळा रोड यासह अन्य महत्त्वाच्या चौकात शांतता पसरली होती. पहिल्या दिवसांप्रमाणे दुसऱ्या दिवशीही सर्वच व्यवहार बंदच होते. शुकशुकाट कायम होता.

कारवाईसाठी ठरावीक वेळच

वीकेंड लॉकडाऊनच्या पहिल्याच दिवशी पोलीस अधीक्षक चिन्मय पंडित, उपअधीक्षक दिनकर पिंगळे यांनी रस्त्यावर उतरून विनाकारण फिरणाऱ्यांना जाब विचारला होता. काही ठिकाणी तर चांगलाच चोपही दिला. हीच स्थिती दुसऱ्या दिवशी होती. नेहमीच्या ठिकाणी वाहतूक पोलीस होते. मात्र, ठिकठिकाणी कारवाई करण्यासाठी पोलिसांचा फौजफाटा काही दिसून आला नाही. त्यांनीही पाठ फिरविल्याचे समोर आले. कोरोनाच्या अनुषंगाने लॉकडाऊन असतानाही बिनधास्तपणे फिरणाऱ्यांची संख्या काही कमी होताना दिसत नाही. पोलीसही ठरावीक ठिकाणी आणि ठरावीक वेळेतच दिसत असल्याने, बहुधा त्याचा फायदा अनेकांकडून घेतला जात असल्याचे समोर येत आहे. विविध ठिकाणी गर्दी दिसून येते. त्यावर नियंत्रण मिळविण्याची गरज आहे.

घरात थांबणे पसंत

लॉकडाऊन, रविवार आणि दुपारचे कडक ऊन लक्षात घेता, बहुसंख्य जणांनी घराच्या बाहेर निघणे टाळले. त्यामुळे वीकेंड लॉकडाऊनच्या पहिल्या दिवसांपेक्षा दुसऱ्या दिवशी रस्त्यावर वाहतुकीचे प्रमाण तसे नगण्यच होते.