धुळे : जिल्ह्यात शासन निर्णयानुसार बुधवारी सकाळी ११ वाजेनंतर कडक लाॅकडाऊनची अंमलबजावणी सुरू झाली. मात्र त्याआधी सकाळी ७ वाजेपासून ११ वाजेदरम्यान एक दिवसाच्या भाजीपाला आणि किराणा साहित्य खरेदी करण्यासाठी नागरिकांनी तौबा गर्दी केली होती. बाजारपेठेत आग्रारोड, पाचकंदील परिसरात नागरिकांची एकच गर्दी झाली होती. मात्र ११ वाजेनंतर पोलिसांनी बाजारपेठेचा ताबा घेतल्यानंतर दुपारी १२ वाजेनंतर सर्वत्र शुकशुकाट दिसून आला.
बुधवारी सकाळी ७ वाजेनंतर बाजारपेठ खुली झाल्यावर एका दिवसाची खरेदी करण्यासाठी नागरिकांनी तौबा गर्दी केल्याचे दिसून आले. दररोज सकाळी ७ ते ११ बाजारपेठ सुरू राहणार असल्याचे जाहीर केलेले असताना पहिल्याच दिवशी जसे महिन्याभराची खरेदी करावयाची आहे. अशापद्धतीने नागरिकांनी सकाळी बाजारपेठेत गर्दी केली. गर्दीत फिजिकल डिस्टन्सिंगचा फज्जा उडाला होता. गर्दीत अनेकांनी पोलीस पकडतील म्हणून फक्त तोंडाला रुमाल बांधलेले दिसून आहे.
कडक पोलीस बंदोबस्त
शहरात सकाळी ७ वाजेपासूनच शहरातील सर्वच प्रमुख चौकामध्ये कडक पोलीस बंदोबस्त लावण्यात आला होता. अनेक ठिकाणी वाहतूक अडविण्यासाठी बॅरिकेट्स लावण्यात आलेले होते. तसेच लोकांना अडवून काय काम आहे याची विचारणा केली जात होती.
दुपारी १२नंतर शुकशुकाट
- ११ वाजेनंतर लाॅकडाऊन सुरू झाल्याचे सांगत पोलिसांनी बाजारपेठेतील भाजीपाला हाॅकर्स आणि लोकांना घरी जाण्याचे सांगत होते. त्यामुळे दुपारी १२ वाजेनंतर मुख्य बाजारपेठेसह सर्वच ठिकाणी शुकशुकाट दिसून आला. रस्त्यावर ठिकठिकाणी पोलीस रस्त्यावरून फिरणाऱ्या लोकांना अडवून विचारपूस सुरू केली. तसेच विनाकारण फिरणाऱ्या तरुणांना लाठीचा प्रसादही मिळाला.
दारूसाठी धावपळ
लाॅकडाऊनमध्ये वाॅइन शाॅपी बंद ठेवण्याचे आदेश आहे, जर कोणाला पाहिजे असेल तर घरपोच दारू पोहचविण्याची मात्र मुभा आहे. पण बुधवारी साक्री रोडवर आणि शहर पोलीस स्टेशनसमोरील वाॅइन शाॅप छुप्यापद्धतीने सुरू होती आणि त्याठिकाणी मद्यशौकिनांनी खरेदीसाठी गर्दी केलेली दिसून आली. हे पोलिसांच्या लक्षात आल्यावर पोलिसांनी ती दुकाने बंद करावयास लावली. यावेळी त्याठिकाणी दारू खरेदी करण्यासाठी आलेल्या शौकिनांना तेथून पळ काढावा लागला.
औद्योगिक वसाहतीतील उद्योग सुरू
- अवधान औद्योगिक वसाहतीतील उद्योग सुरळीत सुरू होते.
अत्यावश्यक सेवा सुरू - शहरातील औषधांची दुकाने मात्र दिवसभर सुरू होती.