धुळे : लाॅकडाऊनदरम्यान शहरात रात्री चौकामध्ये होणारी गर्दी कमी करा तसेच दुपारी आणि सायंकाळी रस्त्यावर काॅलनीच्या मैदानावर क्रिकेट खेळणेही बंद करा तसे केले नाहीतर पोलीस कारवाईला सामोरे जावे लागेल, असा इशारा उपविभागीय पोलीस अधिकारी दिनकर पिंगळे यांनी बुधवारी आयोजित शांतता कमिटीच्या बैठकीत दिला.
लाॅकडाऊन आणि रमजान ईदच्या पार्श्वभूमीवर बुधवारी शहर पोलीस स्टेशनजवळील एका हाॅटेलमध्ये शांतता कमिटीची बैठक बोलविण्यात आली होती. बैठकीच्या अध्यक्षस्थानी उपविभागीय पोलीस अधिकारी दिनकर पिंगळे, देवपूर पोलीस स्टेशनचे सहायक पोलीस निरीक्षक चंद्रकांत पाटील, शहर पोलीस स्टेशनचे नितीन देशमुख, आझादनगर पोलीस स्टेशनचे आनंद कोकरे यांच्यासह शांतता कमिटीचे सदस्य उपस्थित होते.
मुस्लिमबांधवांनी कोविडसंदर्भात शासनाने ठरवून दिलेल्या नियमांचे पालन करत रमजान ईद हा सण साजरा करावा, असे आवाहन यावेळी पोलिसांनी केली.
रात्री चौकात होणारी गर्दी टाळा. लाॅकडाऊनकाळात सर्व बंद असल्याने रस्त्यावर आणि काॅलनी परिसरात नागरिक क्रिकेट खेळतात. ते चुकीचे आहे. ते बंद करण्यात यावे, तसे केले नाही तर मग पोलीस कारवाईला सामोरे जावे लागेल. शहरात विनाकारण बाहेर पडू नका, मोठ्या संख्येने गर्दी करू नका, कोरोना महामारीपासून आपण व आपल्या परिवाराचा बचाव करा. मास्क वापरा, सॅनिटायझरचा वापर करा, अशा सूचनाही यावेळी उपविभागीय पोलीस अधिकारी दिनकर पिंगळे यांनी केल्या.
यावेळी कमिटीच्या सदस्यांनीही सहकार्य करण्याचे आश्वासन पोलीसांना दिले.