झाडांचाही साजरा होतोय सार्वजनिक वाढदिवस!

कळंब : आजवर आपण नेत्यांचे, युवा नेत्यांचे वाढदिवस पाहिले; परंतु, ईटकूर येथे ‘हरित ईटकूर’ उपक्रमांतर्गत मागच्या तीन वर्षांपासून जोपासलेला झाडांचा वाढदिवस अगदी सार्वजनिक स्वरूपात साजरा करून नव्या वर्षाच्या संकल्पाची मुहूर्तमेढ रोवली जाते. यंदा हा सोहळा मंगळवारी पार पडला.

एकेकाळी उजाड अन् ओसाड गाव म्हणून हिणवल्या जाणाऱ्या ईटकूर गावात मागच्या तीन वर्षांपासून गावाला हिरवं करण्याचे स्वप्न घेऊन काही युवक धडपडत आहेत. या संकल्पनेला मूर्त स्वरूप देण्यासाठीच ‘आपलं ईटकूर-हरित ईटकूर’ या चळवळीचा श्रीगणेशा झाला. यासाठी हरित ईटकूर समिती स्थापन करण्यात आली. समितीच्या माध्यमातून बाबा जगताप, अमर आडसूळ, अभयसिंह आडसूळ, महेश आडसूळ, प्रकाश फरताडे, प्रभाकर आडसूळ, बिभीषण देसाई, नवनाथ आडसूळ, राहुल तोरगले, समाधान गाडे यांच्यासह असंख्य युवकांनी ‘हरित ईटकूर’ या बॅनरखाली एकत्र येत वृक्ष लागवड व संगोपनावर भर देणारा कार्यक्रम राबवण्यास सुरुवात केली. यातून झोपडपट्टी भागात नारळाची बाग, मुख्य रस्त्यावर शोभेची, बाजार मैदानात लिंब, करंजी, सप्तपर्णी, ग्राप समोर वटवृक्ष, पशुवैद्यकीय दवाखाना आदी भागात आजवर विविध पाचशे झाडांची जोपासना करण्यात आली आहे.

दरवर्षी १३ जुलैरोजी या झाडांचा वाढदिवस, वृक्षपूजन व नवीन वर्षाचा संकल्प वृक्ष लागवड करून करण्यात येतो. यंदाचा हा सोहळा आ. कैलास पाटील, राष्ट्रवादीचे डॉ. प्रतापसिंह पाटील यांच्याहस्ते पार पडला. यावेळी मुंबई महानगरपालिकेचे कार्यकारी अभियंता दत्तात्रय आडसूळ, शिवसेनेचे प्रवीण कोकाटे, वन अधिकारी सचिन लोंढे, माजी जि. प. सदस्य बालाजी आडसूळ, सरपंच मोहरबाई कस्पटे, रोटरीचे सचिव अरविंद शिंदे, पदाधिकारी डॉ. गिरीश कुलकर्णी, हर्षद अंबुरे, वैजनाथ पकवे, भगतसिंग गहेरवार, केमिस्टचे अध्यक्ष प्रमोद पोते आदी उपस्थित होते. यावेळी अमर आडसूळ, बाबा जगताप, अभयसिंह आडसूळ यांनी स्वागत केले, तर सेवानिवृत्त आदर्श शिक्षक तुकाराम शिंदे यांनी सूत्रसंचालन केले.

चौकट...

यंदा सातशे वृक्ष जगवण्याचा संकल्प...

मागच्या तीन वर्षांत पाचशेच्या आसपास झाडं जगवण्याचे, वाढवण्याचे धनुष्य पेलल्यानंतर हरित ईटकूर समितीने कळंब रस्त्यावर दुतर्फा सातशे झाडे लावली आहेत. यात नारळ, बदाम, मोहगणी अशा विविध वृक्षांचा समावेश आहे. यासाठी लोकवर्गणी जमा करण्यात येते. मंगळवारी गावचे सुपुत्र तथा मुंबई महानगरपालिकेत कार्यकारी अभियंता म्हणून कार्यरत असलेले दत्तात्रय बाबूराव आडसूळ यांनी २५ हजारांची मदत करून उपक्रमास बळ दिले.