उस्मानाबाद : कोराेनाचा प्रादुर्भाव वाढून निर्बंध लागल्याने राज्यभरात रक्तदानाचे उपक्रम थांबले. परिणामी, रक्ताचा तुटवडा मोठ्या प्रमाणात जाणवत आहे. हा तुटवडा दूर सारण्याच्या हेतूने ‘लाेकमत’च्या वतीने ७ जुलै रोजी कळंबमध्ये शिबिर आयोजित करण्यात आले आहे. सकाळी १० ते सायंकाळी ५ या वेळेत पंचायत समितीच्या सभागृहात हे शिबिर होणार असून, यात सहभागी होण्याचे आवाहन लोकमतसह मान्यवरांनी केले आहे.
जिल्हाभरातील रक्तपेढीत सध्या रक्ताचा ठणठणाट आहे. त्यामुळे डॉक्टरांना रुग्णांवर उपचार करताना अडचणी येत आहेत. या पार्श्वभूमीवर ‘लोकमत’ने सामाजिक दायित्व म्हणून रक्तदान शिबिरासाठी पुढाकार घेतला आहे. ७ जुलैला कळंब येथील शिबिराचे सकाळी १०.३० वाजता नगराध्यक्ष संजय मुंदडा, शिवसेना तालुका प्रमुख शिवाजी कापसे, भाजप तालुकाध्यक्ष अजित पिंगळे, राष्ट्रवादी काँग्रेस तालुकाध्यक्ष प्रा. श्रीधर भवर, काँग्रेसचे तालुकाध्यक्ष पांडुरंग कुंभार, उपविभागीय अधिकारी अहिल्या गाठाळ, तहसीलदार रोहन शिंदे, गटविकास अधिकारी एन. पी. राजगुरू, वैद्यकीय अधीक्षक डॉ. जीवन वायदंडे, पोलीस निरीक्षक तानाजी दराडे या मान्यवरांच्या प्रमुख उपस्थितीत उद्घाटन होईल. या शिबिरात आपला सक्रिय सहभाग नोंदवून रक्तदानाची लोकचळवळ उभी करावी, असे आवाहन यानिमित्ताने करण्यात येत आहे.
विविध संघटना होणार सहभागी
कळंबमध्ये ७ जुलै रोजी होणाऱ्या लसीकरण शिबिरात आतापर्यंत विविध सामाजिक संघटना, संस्था, समूह यांनी सहभाग नोंदविला आहे. याशिवाय, आता एमएच २५ हेल्पिंग हँड, शिक्षणमहर्षी ज्ञानदेव मोहेकर मल्टिस्टेट परिवार व ॲग्रो इंडस्ट्रीज यांनीही सहभाग नोंदविला आहे. याशिवाय, इतर इच्छुक रक्तदात्यांसाठीही हे शिबिर हे खुले असणार आहे.