गुणवंत जाधवर
उमरगा : सर्वत्र कोरोना संसर्गाची भीती असतानाही महिला अत्याचाराच्या किळसवाण्या आणि घृणास्पद घटनांची मालिका मात्र सुरूच आहे. तालुक्यातही याहून वेगळी परिस्थिती नाही. घराबाहेर आणि उंबऱ्याच्या आतही ‘ती’ सुरक्षित नसल्याचे वास्तव पोलीस दप्तरी नोंद असलेल्या अत्याचाराच्या आकडेवारीतून समोर येत आहे. तालुक्यात आठ महिन्यांत ५ अल्पवयीन मुलींचे अपहरण झाल्याच्या घटना घडल्या आहेत.
यावर्षी सुरुवातीला कोरोनाच्या पार्श्वभूमीवर काही महिने कडक निर्बंध लागू होते. यामुळे महिला अत्याचाराच्या घटनांमध्ये थोड्याफार प्रमाणात घट झाली आहे. बहुतांश प्रकरणांत आरोपी हे पीडितेच्या ओळखीतले आहेत. आमिष दाखवून, तसेच पळवून नेऊन अत्याचार केल्याची प्रकरणे अधिक आहेत. विशेष म्हणजे विनयभंगाचे प्रकारही झाले आहेत. चालू वर्षी आठ महिन्यांत अपहरणाचे ५ गुन्हे नोंद आहेत. त्यामुळे महिला अत्याचाराला पायबंद घालण्याचे आव्हान पोलीस दलासमोर आहे. महिलांच्या तक्रारी संवेदनशीलपणे व गांभीर्याने घेतल्या जातात. पीडितेला न्याय मिळवून देण्यासाठी जलद तपास करून दोषारोपपत्र न्यायालयात पाठविले जाते. मात्र, बहुतांश प्रकरणांत आरोपी ओळखीचे असतात किंवा काही वेळा प्रेम प्रकरणांतूनही तक्रारी दाखल होत असल्याचे आढळून येते.
गतवर्षीच्या तुलनेत घट
उमरगा तालुक्यात गतवर्षी २०२० मध्ये अत्याचाराचे ५, तर अपहरणाचे ८ गुन्हे दाखल होते. यंदा मात्र अत्याचाराचा एकही गुन्हा नसून अपहरणाचा आकडा ५ झाला आहे. यामुळे गेल्या वर्षीच्या तुलनेत बलात्कार व अपहरणाचे प्रकार कमी झाले आहेत.
गतवर्षी १३ गुन्हे झाले होते दाखल
अल्पवयीन मुलींवर अत्याचार आठ महिन्यांतील एकूण अत्याचाराची ५ प्रकरणे झाली आहेत. या सर्व मुली अल्पवयीन आहेत. या प्रकरणांपैकी ४ मुली १६ वर्षे वयाच्या, तर एक मुलगी १७ वर्षे वयाची आहे. या सर्व प्रकरणांत अल्पवयीन मुली पीडित आहेत. गतवर्षी १३ मुली वासनेच्या शिकार ठरल्या होत्या. त्यामुळे त्यांचे जगणे कठीण होऊन बसले आहे.
कोरोनाच्या पार्श्वभूमीवर शाळा बंद असल्याने मुले-मुली जास्त प्रमाणात घराबाहेर पडत नाहीत. शिवाय, कोरोनामुळे शाळा बंद असल्याने पालकांची मानसिकतादेखील बदलली असून, यातूनच तालुक्याच्या ग्रामीण भागात काही ठिकाणी अल्पवयीन मुलींची लग्नदेखील झाल्याचे दिसून येत आहे.
तालुक्यातील आकडेवारी
महिना बलात्कार अपहरण
जानेवारी निरंक निरंक
फेब्रुवारी निरंक १
मार्च निरंक १
एप्रिल निरंक २
मे निरंक निरंक
जून निरंक निरंक
जुलै निरंक निरंक
ऑगस्ट निरंक १
कोट....
८० टक्के गुन्ह्याची उकल
उमरगा तालुक्यात गेल्या आठ महिन्यांत अपहरणाचे ५ गुन्हे नोंद झाले आहेत. यापैकी ४ गुन्ह्यांची उकल करण्यात उमरगा पोलिसांना यश आले आहे. ऑगस्ट महिन्यात झालेल्या केवळ एका अपहरण गुन्ह्याची उकल अद्याप बाकी आहे. चालू वर्षीच्या ८० टक्के गुन्ह्यांचा तपास करण्यात पोलीस यंत्रणेला यश आले आहे.
- मुकुंद आघाव, पोलीस निरीक्षक, उमरगा