नवऱ्याचं क्रूर कृत्य! गर्लफ्रेंडची हत्या करुन मृतदेह जाळला, हाडं पेटीत भरुन बायकोकडे पाठवली

माणुसकीला काळीमा फासणारी एक घटना समोर आली आहे.

उत्तर प्रदेशातील झाशीमध्ये माणुसकीला काळीमा फासणारी एक घटना समोर आली आहे. दोन लग्न झालेल्या एका निवृत्त रेल्वे कर्मचाऱ्याने आपल्या 'लिव्ह-इन' पार्टनरची हत्या केली. पुरावा नष्ट करण्यासाठी त्याने मृतदेह जाळला आणि उरलेली हाडं एका लोखंडी पेटीत भरून आपल्या दुसऱ्या पत्नीच्या घरी पाठवली. लोडर चालकाच्या सतर्कतेमुळे हा भयानक प्रकार उघडकीस आला आहे.

मिळालेल्या माहितीनुसार, मुख्य आरोपी रामसिंह याची आधीच दोन लग्न झाली होती. तरीही तो प्रीती नावाच्या महिलेसोबत लिव्ह-इन रिलेशनशिपमध्ये राहत होता. प्रीती सातत्याने रामसिंहकडे पैशांची मागणी करत होती आणि आतापर्यंत तिने त्याच्याकडून लाखो रुपये घेतले होते. या त्रासाला कंटाळून रामसिंहने तिची हत्या केली. हत्या केल्यानंतर त्याने मृतदेह एका निळ्या रंगाच्या पेटीत ठेवून जाळला. मृतदेहाची राख त्याने नदीत वाहून दिली, मात्र शिल्लक राहिलेली हाडे आणि कोळसा त्याच पेटीत भरला. त्यानंतर त्याने आपल्या मुलाच्या मदतीने ही पेटी एका लोडर गाडीतून आपली दुसरी पत्नी गीता हिच्या घरी पाठवून दिली.

शनिवारी आणि रविवारी मध्यरात्री झाशी पोलीस नियंत्रण कक्षाला एका लोडर चालकाचा फोन आला. आपल्याला या पेटीबद्दल संशय असल्याचं त्याने सांगितलं. पोलिसांनी तातडीने घटनास्थळी धाव घेत गीता नावाच्या महिलेच्या घरातून ती पेटी जप्त केली. पेटी उघडताच पोलीसही चक्रावून गेले.त्यात मानवी हाडांचे अवशेष आणि कोळसा आढळून आला. फॉरेन्सिक टीमने तपासणी केल्यानंतर ते अवशेष मानवी असल्याचं स्पष्ट झालं आहे.

झाशीच्या पोलीस अधीक्षक प्रीती सिंह यांनी दिलेल्या माहितीनुसार, या प्रकरणात आरोपी रामसिंहचा मुलगा नितीन याच्यासह दोन जणांना ताब्यात घेण्यात आलं आहे. मुख्य आरोपी रामसिंह सध्या फरार असून पोलीस त्याचा शोध घेत आहेत. लोडर चालक जयपाल याने सांगितले की, ४०० रुपयांत गाडी भाड्याने ठरवून ही पेटी वाहून नेण्यात येत होती, मात्र संशय आल्याने त्याने पोलिसांना कळवलं.