Video - "मी तुम्हाला आणि तुमच्या मुलीला मारून टाकेन"; प्रिन्सिपलची जीवे मारण्याची धमकी

एका खासगी शाळेच्या प्रिन्सिपलचा एक धक्कादायक व्हिडीओ सोशल मीडियावर वेगाने व्हायरल होत आहे.

उत्तर प्रदेशातील हापूरमधील एका खासगी शाळेच्या प्रिन्सिपलचा एक धक्कादायक व्हिडीओ सोशल मीडियावर वेगाने व्हायरल होत आहे. यामध्ये प्रिन्सिपल एका सात वर्षांच्या विद्यार्थिनीला आणि तिच्या कुटुंबाला जीवे मारण्याची धमकी देते. व्हिडिओमध्ये प्रिन्सिपल शाळेच्या ऑफिसमध्ये उभी आहे. मुलीचे वडील शाळेत येताच ती संतापली.

रागाच्या भरात प्रिन्सिपल विद्यार्थिनीच्या वडिलांची कॉलर धरते आणि म्हणते, "२० नोव्हेंबरपर्यंत तुमच्या मुलीला शाळेतून काढा नाहीतर मी तुम्हाला आणि तुमच्या मुलीला मारून टाकेन." कुटुंबीयांनी दिलेल्या माहितीनुसार, संपूर्ण वाद एका क्षुल्लक कारणावरून सुरू झाला. मुलीने वर्गात मस्ती केली होती, ज्यामुळे प्रिन्सिपल संतापली. वडील मुलीला घेण्यासाठी शाळेत आले तेव्हा परिस्थिती आणखी बिकट झाली.

उत्तर प्रदेश में हापुड़ के एक निजी स्कूल की प्रिंसिपल सात साल की छात्रा और उसके परिजनों को खुलेआम जान से मारने की धमकी दे रही हैं। गुस्से में वह छात्र के पिता का कॉलर पकड़कर झकझोरती हैं और बार-बार चीखते हुए कहती है कि 20 नवम्बर तक अपनी बच्ची को स्कूल से निकाल लो नहीं तो मैं… pic.twitter.com/qqs0l8Qbxf

— Bhadohi Wallah (@Mithileshdhar) November 22, 2025

व्हिडिओमध्ये स्पष्टपणे दिसत आहे की, प्रिन्सिपल वारंवार "मी तुम्हाला मारून टाकीन" असं मोठमोठ्याने ओरडत आहेत, तर जवळ उभे असलेले इतर पालक आणि कर्मचारी गप्प उभे आहेत. व्हिडीओ व्हायरल झाल्यानंतर, परिसरात मोठ्या प्रमाणात संताप व्यक्त होत आहे. मुलीच्या कुटुंबाने पोलीस ठाण्यात तक्रार दाखल केली आहे आणि जिल्हा शिक्षण विभागाच्या अधिकाऱ्यांकडेही तक्रार केली आहे.

जिल्हा दंडाधिकारी अभिषेक पांडे यांनी हे प्रकरण गांभीर्याने घेतलं आहे आणि जिल्हा मूलभूत शिक्षण अधिकाऱ्यांना या प्रकरणाची तात्काळ चौकशी करण्याचे आदेश दिले आहेत. कुटुंबाने प्रिन्सिपलवर जीवे मारण्याची धमकी दिल्याबद्दल गुन्हा दाखल करण्याची मागणी केली आहे. सध्या या व्हिडीओची सर्वत्र जोरदार चर्चा रंगली आहे.