फ्रान्सिस्को काव्र्हालो खून प्रकरण : दोन फरार संशयित अखेर जेरबंद

हत्येच्या घटनेनंतर आठवडयानंतर हे दोघे संशयित पोलिसांना सापडले.

ठळक मुद्देदारुच्या नशेत झालेल्या भांडणातून हा खून झाला होता.अटक केलेले दोन्हीही संशयित या हत्या प्रकरणातील प्रमुख संशयित आहेत.

मडगाव - गोव्यातील राय - मनोरा येथे फ्रानिस्को कुलासो (33) याचा खून करुन मुंबईत पळून गेलेला दोन संशयितांच्या आज गोवा पोलिसांनी मडगावात मुसक्या आवळल्या. जॉयल ग्रासा (24) व वोर्फिन कुलासो (22) यांना आज गुरुवारी सकाळी जेरबंद करण्यात आले. हत्येच्या घटनेनंतर आठवडयानंतर हे दोघे संशयित पोलिसांना सापडले. खून केल्यानंतर ते दोघेही मुंबईला पळून गेले होते. पोलिसांनी एक पथक मुंबईलाही पाठविले होते. संशयितांविरुध्द पोलिसांनी न्यायालयातून अजामीनपात्र अटक वॉरन्टही मिळविले होते. आज सकाळी मुंबईहून वरील संशयित गोव्यात आले असता, त्यांना मडगावात पोलिसांनी ताब्यात घेतले. नंतर त्यांना रितसर अटक करण्यात आल्याची माहिती मडगाव विभागाचे पोलीस उपअधिक्षक राजू राउत देसाई यांनी दिली. अटक केलेले दोन्हीही संशयित या हत्या प्रकरणातील प्रमुख संशयित आहेत.
मागच्या गुरुवारी रात्री फ्रान्सिस्को याचा खून झाला होता. दारुच्या नशेत झालेल्या भांडणातून हा खून झाला होता. मयत फ्रान्सिस्को आरडाओरडा करत असल्यामुळे संतापलेल्या सहा युवकांनी त्याच्यावर फुटलेल्या बाटलीने हल्ला चढविला. मृतदेहाची ओळख पटल्यानंतर मायणा - कुडतरी पोलिसांनी या खून प्रकरणाचा छडा लावताना रॉयन आल्वारिस (21), विल्टन कुतिन्हो (34), मेल्बर्न कुतिन्हो (22) रहाणारे सर्व नुवे व वालेन्सियो वाझ (26) शिरोडा या चौघांना अटक केली होती. मारामारीचा हा प्रकार राय - मनोरा येथे कार्लटन बारजवळ घडला होता. या बारमध्ये सर्व सहा संशयित दारु पित बसलेले असताना त्यापूर्वी आणखी दोन बारमध्ये जाऊन दारु पिऊन तर्र होऊन आलेला फ्रान्सिस्को या बारमध्ये येऊन दारुसाठी मोठमोठय़ाने दंगा करु लागला. त्यामुळे संशयित खवळले. त्यांची मयताकडे बाचाबाची झाली त्यानंतर रागाच्या भरात संशयितांनी त्याच्यावर फुटलेल्या बाटलीने वार केले होते. या मारहाणीने मयत बेशुद्ध होऊन पडला असता संशयितांनी त्याला आपल्या मोटरसायकलवर बसवून वाशे-लोटली येथे पुलाजवळ नेऊन टाकून दिले होता.
६ सप्टेंबर रोजी पोलिसांना बोरी पुलाच्या खाली मृतदेह असल्याचे कळविल्यानंतर पोलिसांनी तेथे जाऊन पहाणी केली असता मृताच्या अंगावर चार जखमा सापडल्याने पोलिसांनी अज्ञाताविरोधात खुनाचा गुन्हा नोंद केला होता. कुठलाच सुगावा मिळत नसल्याने हा खून पोलिसांसाठी आव्हान बनले होते. या खूनाचा तपास करण्यासाठी उपअधीक्षक राजीव राऊत देसाई यांच्या नेतृत्वाखाली पोलीस निरीक्षक प्रविणकुमार वस्त, संदेश चोडणकर, रवी देसाई, विल्सन डिसोझा, तुषार लोटलीकर, राहुल परब, सलीम शेख, पोलीस शिपाई अविनाश नाईक, सोमनाथ नाईक, अजय नाईक, विकास नाईक, विकास कौशिक व चेतन कोळी यांचे पथक तैनात केले होते. या पथकाने राय-मनोरा भागातील सर्व दारुची दुकाने पिंजून काढून माहिती गोळा केली होती. त्यात काल्र्टन बारमध्ये दंगा झाल्याचे त्यांना कळून चुकल्यानंतर त्यांनी संशयितांच्या मुसक्या आवळल्या.
जॉयल ग्रासा व वोर्फिन कुलासो हे फरार झाले होते. जॉयल हा वीज खात्यात कंत्रटी कामगार म्हणून करत होता तर वोर्फिन हा परदेशात कामाला होता अशी माहिती पोलिसांनी दिली. भारतीय दंड संहितेच्या 302 व 363 कलमाखाली त्यांच्यावर गुन्हा नोंद करण्यात आला आहे. दरम्यान, या खून प्रकरणात पुर्वी अटक केलेल्या चार संशयितांच्या पोलीस कोठडीची मुदत संपल्याने काल त्यांना न्यायालयात उभे केले असता, आठ दिवसांची पोलीस कोठडी देण्यात आली. मायणा - कुडतरी पोलीस ठाण्याचे पोलीस निरीक्षक प्रवीणकुमार वस्त यांच्या मार्गदर्शनाखाली पुढील पोलीस तपास चालू आहे.