लघुशंका करण्यास हटकत मारहाण केल्याच्या रागातून दुचाकी जाळली

Crime News: डिलोन डॉमनिक हेन्ड्रिक्स हे उत्तनच्या शिरे मार्गावरील मोठा क्रॉस जवळ राहतात. मंगळवारी रात्री त्यांच्या दुचाकी जवळ एका अनोळखी तरुण लघुशंका करत होता .

लोकमत न्यूज नेटवर्क 

मीरारोड - दुचाकी जवळ लघुशंका करत असलेल्या तरुणास हटकले व मारहाण केली याचा राग ठेऊन त्या तरुणाने तीन दुचाकींवर ज्वलनशील द्रव्य टाकून त्यातील एक दुचाकी पेटवून दिल्याची घटना भाईंदरच्या उत्तन भागात घडली आहे . 

डिलोन डॉमनिक हेन्ड्रिक्स हे उत्तनच्या शिरे मार्गावरील मोठा क्रॉस जवळ राहतात . मंगळवारी रात्री त्यांच्या दुचाकी जवळ एका अनोळखी तरुण लघुशंका करत होता . त्यावेळी त्या तरुणास एकाने लघुशंका करू नको सांगत हटकले व मारहाण केली . त्या नंतर तो तरुण तेथून निघून गेला . 

परंतु मध्यरात्री अडीचच्या सुमारास हेन्ड्रिक्स यांच्या शेजाऱ्याने त्यांना उठवले व तुमची दुचाकी पेटत असल्याचे सांगितले . दुचाकीला आग लागल्याचे पाहून हेन्ड्रिक्स आदींनी पाण्याचा मारा करून आग विझवली . पण तो पर्यंत दुचाकी जळून गेली होती . तसेच लगतच्या अन्य दुचाकींवर देखील ज्वलनशील द्रव्य टाकण्यात आल्याचे आढळून आले .

या प्रकरणी सीसीटीव्ही तपासले असता मध्यरात्री दोनच्या सुमारास तोच लघुशंका करणारा तरुण हेन्ड्रिक्स यांच्या घरा जवळ येताना व जाताना दिसून आला . या प्रकरणी उत्तन सागरी पोलीस ठाण्यात गुन्हा दाखल करण्यात आला असून पोलीस आरोपीचा आहेत . सदर आगीत दुचाकीचे ३० हजार रुपयांचे नुकसान झाल्याचे म्हटले आहे . तर आरोपी तरुण हा मच्छीमार बोटीवरील खलाशी असून तो या भागात बेकायदा चालणाऱ्या दारूच्या गुत्त्यावर मद्यपान करण्यासाठी आला होता असे सूत्रांनी सांगितले .