कुणाच्या खांद्यावर कुणाचे ओझे

दत्ता मोरस्कर , नाचनवेल एस.टी. महामंडळाने ज्येष्ठ नागरिकांचा सन्मान करण्यासाठी प्रवास भाड्यात सवलत देणारी योजना चालू ठेवली आहे. वृद्ध मंडळींना दिलासा देणार्‍या योजनेला चांगला प्रतिसाद मिळाला. या योजनेत घुसखोरी वाढत असून अनेक जण या योजनेच्या माध्यमातून राजरोस प्रवास करीत असून महामंडळाला ‘चुना’ लावत आहेत. ६५ वर्षांपुढील नागरिकांसाठी ही योजना आहे. त्यांना प्रवास भाड्यात पन्नास टक्के सवलत मिळते. यावर ज्येष्ठ नागरिक खुश आहेत; पण याच आर्थिक आकर्षणामुळे चाळिशी पार केलेले किंवा न केलेले अनेक जण या योजनेच लाभार्थी बनले आहेत. अशा व्यक्ती वाहकांच्या लक्षात येतातही; पण वाहक प्रत्येक वेळी कसा वाद घालणार? वेळ आलीच तर बोगस लाभार्थी पूर्ण भाड्याचे पैसे देऊन वाद टाळतात. ‘कुणाच्या खांद्यावर कुणाचे ओझे’ पडलेल्या या योजनेला घुसखोरीपासून वाचवण्याचे आव्हान महामंडळाच्या अधिकार्‍यांसमोर असूनही चांगली योजना चालू राहणे गरजेचे आहे. त्यासाठी महामंडळाने गांभीर्याने उपायोजना करण्याची गरज आहे. पात्र असलेल्या अनेक ज्येष्ठ नागरिकांकडे अजूनही वयाचे योग्य दाखले नाहीत; पण चाळिशीच्या व्यक्तीकडे (शॉर्टकटने) अशी कार्ड दिसत आहेत. त्यामुळे ते बिनधास्तपणे प्रवास करीत आहेत. वयाची अट पूर्ण करणारे कार्ड मिळाले की हा सवलतीचा प्रवास सुरू होतो. परिणाम ही चांगली योजना ज्येष्ठ नागरिक नसणार्‍यांच्या कचाट्यात सापडली आहे.