मुख्य जलवाहिनीची गळती रोखली

 वाळूज महानगर : सिडको प्रशासनाने मुख्य जलवाहिनीची गळती रोखल्यामुळे रहिवाशांना गरजेपुरते पाणी मिळणार आहे. सध्या सिडकोवासीयांना तीव्र पाणीटंचाईला तोंड द्यावे लागत आहे. सिडको प्रशासनाने केलेल्या दुर्लक्षामुळे कार्यालयापासून हाकेच्या अंतरावर असलेली मुख्य जलवाहिनी ग्रोथ सेंटर भागात गेल्याने अनेक दिवसांपासून गळत होती. त्यामुळे रोज हजारो लिटर पाणी वाया जात होते. गळतीमुळे जलकुंभात पुरेसे पाणी साठत नसल्यामुळे नागरिकांना गरजेपुरतेही पाणी मिळत नव्हते. पाण्यासाठी सिडको परिसरातील रहिवासी पायपीट करीत. तरीही प्रशासनाने या गळतीकडे लक्ष दिले नाही. सिडकोच्या मुख्य जलवाहिनीला गळती या मथळ्याखाली लोकमतने १८ मेच्या अंकात बातमी प्रसिद्ध करून अधिकार्‍यांच्या दुर्लक्षामुळे हजारो लिटर पाणी वाया जात असल्याचे सिडको प्रशासनाच्या निदर्शनास आणले होते. या वृत्ताची तात्काळ दखल घेऊन सिडको प्रशासनाने मुख्य जलवाहिनीची गळती रोखली. सिडकोच्या मुख्य जलवाहिनीची गळती थांबल्यामुळे जलकुंभात पाणी साठणार आहे. नागरिकांची पाण्यासाठी होणारी गैरसोय काही प्रमाणात तरी थांबणार आहे.