मनपाकडे हस्तांतरण; नागरिकांना यातना

विकास राऊत , औरंगाबाद
सिडकोच्या मनपाकडे हस्तांतरणाला आठ वर्षे पूर्ण झाली आहेत. या काळात मनपाने सिडको- हडकोतील २२ वॉर्डांतील नागरी सुविधांवर अंदाजे ५० कोटी रुपचे खर्च केले आहेत. आठ वर्षांत एवढी रक्कम खर्चूनही सिडकोतील समस्या मात्र ‘जैसे थे’ असल्याने नागरिकांना आंदोलने, उपोषणे करावी लागतात.
सिडकोच्या मूळ समस्या तशाच असून, नागरिक पालिकेच्या कारभारालाही वैतागले आहेत. शिवसेना- भाजपा युतीचे १४ नगरसेवक या भागातून पालिकेत निवडून गेले आहेत, असे असतानाही सिडकोवासीयांना वाटाण्याच्या अक्षता मिळत आहेत.
१५ कोटी रुपयांमध्ये सिडको- हडकोतील सेवा- सुविधांचे मनपाकडे हस्तांतरण करून सिडकोने एक प्रकारे माघार घेतली. त्यानंतर आजवर नागरिकांना भेडसावणाऱ्या समस्यांकडे सिडको प्रशासनाने ढुंकूनही पाहिलेले नाही. वसाहती निर्माण करायच्या आणि अर्धवट अवस्थेत स्थानिक स्वराज्य संस्थांकडे वर्ग करून हात वर करायचे. असाच प्रकार सिडकोने केल्यामुळे नागरिकांना अनेक यातनांचा सामना करावा लागत आहे.
ग्रीनबेल्ट वैराण वाळवंटाप्रमाणे वाळून गेले आहेत. जे शिल्लक आहेत, त्यावर म्हशींचे गोठे निर्माण झाले आहेत. उद्याने बकाल झाली आहेत. दोन दिवसांआड अनियमित पाणीपुरवठ्यामुळे नागरिक वैतागले आहेत. अंतर्गत रस्त्यांवर खड्डेच खड्डे झालेत. त्यांची डागडुजी करण्याची मागणी होत आहे. वाहतूक बेट खराब झाले आहेत. ड्रेनेजची जुनाट यंत्रणा वारंवार कोलमडते. अशा समस्यांमध्ये सिडको अडकले असून, मनपा हस्तांतरणामुळे यामध्ये काहीही बदल झाला नसल्याचा आरोप नागरिक करीत आहेत.
बॉटनिकल गार्डन आणि काही मर्जीतल्या कामांवर मनपाने कोट्यवधी रुपयांची उधळपट्टी केल्यामुळे कुठल्याही वॉर्डात पाहिजे त्या प्रमाणात विकासकामे झालीच नाहीत, असे चित्र आहे. सिडको वसाहतीतील नागरी सुविधांसाठी शासनाने मनपाला दिलेले १५ कोटी रुपये एका झटक्यात संपले.
बॉटनिकल गार्डन, कचरा संकलन आणि प्रशासकीय खर्चावर १५ कोटी रुपये खर्च झाले. मनपाने शहरासाठी ५० कोटी रुपयांच्या रस्त्यांची कामे हाती घेतली आहेत. त्यात सिडकोतील एकच रस्ता आहे. रस्ता रुंदीकरण मोहिमेत १०० कोटींची कामे झाली, त्यातसुद्धा सिडकोचा एकही रस्ता नव्हता.
लीजहोल्डचा तंटा मिटेना
1सिडको-हडकोमध्ये सद्य:स्थितीमध्ये ३५ हजार मालमत्ता आहेत. येथील मालमत्ता ९९ वर्षांच्या करारावर असल्यामुळे मालमत्ताधारकांनी मालमत्ता स्वत:च्या नावावर करण्याची मागणी केली आहे. लीजहोल्ड टू फ्रीहोल्ड करण्याचा मुद्दा सध्या गुलदस्त्यात आहे.
अपुरे मनुष्यबळ
2उपायुक्त, वॉर्ड अधिकारी, कर्मचारी बदल्यांमुळे सिडकोचा कारभार पूर्णपणे ढेपाळला आहे. हस्तांतरणानंतर ‘ब’ आणि ‘ई’ ही वॉर्ड कार्यालये सुरू झाली. वॉर्ड अधिकारी, अभियंते आणि तृतीय श्रेणीतील कर्मचाऱ्यांच्या बदल्यांमुळे ही कार्यालये नेहमीच चर्चेत असतात. २०० कर्मचाऱ्यांचा फौजफाटा असूनही सिडकोवासीयांना सुविधांसाठी मुख्यालयापर्यंत तक्रारी कराव्या लागतात.
सिडकोसाठी मनपाने काय केले
3पालिकेने काल २ जुलै रोजी दिलेल्या प्रसिद्धीपत्रकात सिडको- हडकोत आठ वर्षांमध्ये सुविधा दिल्याचा दावा केला आहे. बॉटनिकल गार्डन, सलीम अली सरोवर सुशोभीकरण, रोझ गार्डन, गरवारे स्टेडियम परिसरात जलतरण तलावाचे काम लवकरच पूर्ण करण्यात येणार असल्याचे मनपा प्रशासनाने म्हटले आहे. आठ वर्षांमध्ये मनपाने कर्तव्य समजून सिडको- हडको परिसरात नियमित रस्ते, ड्रेनेज, पाणीपुरवठा, विद्युत देखभाल दुरुस्तीसह वरील कामे करण्याचा प्रयत्न केला आहे.