‘सुपर स्पेशालिटी’ च्या कामास प्रारंभ

औरंगाबाद : घाटी रुग्णालयात केंद्र आणि राज्य सरकारच्या साह्याने उभारण्यात येणाऱ्या २०० खाटांच्या स्वतंत्र सुपर स्पेशालिटी विभागाच्या कामाला अखेर सुरुवात झाली आहे. या विभागाच्या प्रस्तावित जागेतील जुने क्वॉटर्स तोडण्यात येत आहे.सुपर स्पेशालिटी विभागासाठी १५० कोटी रुपये मंजूर करण्यात आले आहेत. यामध्ये कें द्र सरकारचे १२० कोटी, तर राज्य सरकारचा ३० कोटींचा निधी उपलब्ध होणार आहे. या विभागाच्या इमारतीसाठी प्रशासनाने सर्जिकल इमारतीच्या पाठीमागे असलेली जागा उपलब्ध करून दिली. या ठिकाणी जुने क्वॉटर्स आहेत. इमारतीची दुरवस्था झाल्याने त्यांचा वापर होत नव्हता. काही दिवसांपूर्वीच दिल्लीहून कंत्राटदाराचे कर्मचारी दाखल झाले आहेत.याठिकाणी कामासाठी जागेला पत्र्याचे कुंपण लावण्यात आले असून, येथील जुने क्वॉटर्स तोडण्यात येत आहे. भूमिपूजन होऊन लवकरच बांधकामाला सुरुवात होईल, अशी अपेक्षा व्यक्त होत आहे. या जागेत उच्च दाबाच्या विद्युत वाहिन्या, भूमिगत जलवाहिन्या आहेत. त्यामुळे कामात अडथळा येणार आहे. हे अडथळे दूर करण्यासाठी प्रयत्न सुरू आहेत. सुपर स्पेशालिटी विभागाच्या कामाला सुरुवात झाल्याची माहिती वैद्यकीय अधीक्षक डॉ. सुहास जेवळीकर यांनी सांगितले.