पोलिस दल देणार एक दिवसाचे वेतन

परभणी : नक्षली हल्ल्यात शहीद झालेल्या लक्ष्मण मुंडे यांच्या कुटुंबीयांना परभणी पोलिस दलातील पोलिस कर्मचार्‍यांचे एक दिवसाचे वेतन देण्यात येणार आहे.

परभणी : नक्षली हल्ल्यात शहीद झालेल्या लक्ष्मण मुंडे यांच्या कुटुंबीयांना परभणी पोलिस दलातील पोलिस कर्मचार्‍यांचे एक दिवसाचे वेतन देण्यात येणार असल्याची माहिती पोलिस अधीक्षक संदीप पाटील यांनी दिली. गंगाखेड तालुक्यातील अंतरवेली येथील लक्ष्मण कुंडलिक मुंडे हे गडचिरोली येथे पोलिस हेडकॉन्स्टेबल म्हणून बारा वर्षांपासून सेवेत होते. अंतरवेलीसारख्या छोट्याशा गावात शेतकरी कुटुंबात जन्मलेले लक्ष्मण मुंडे आपल्या कर्तव्याप्रती नेहमीच प्रामाणिक असत. गडचिरोलीसारख्या नक्षली भागात स्कोड सी ६० या अति महत्त्वाच्या विभागात कर्तव्य बजावत होते. १० मे रोजी आपल्या सहा सहकारी जवानांसमवेत या भागात गस्त घालत असताना नक्षलवाद्यांनी घडविलेल्या स्फोटात लक्ष्मण मुंडे हे शहीद झाले. शहीद लक्ष्मण मुंडे यांच्या पार्थिवदेहावर १२ मे रोजी शासकीय इतमामात अंत्यसंस्कार करण्यात आले. परभणी जिल्हा पोलिस दलातर्फे पोलिस अधीक्षक संदीप पाटील यांनी पुष्पचक्र अर्पण केले. तसेच अप्पर पोलिस अधीक्षक नियती ठाकर, उपविभागीय पोलिस अधिकारी शंकर केंगार, पोलिस निरीक्षक राठोड, गंगाखेड पोलिस ठाण्याचे पोलिस निरीक्षक उत्तम चव्हाण, पिंपळदरी पोलिस ठाण्याचे सहायक पोलिस निरीक्षक तुकाराम ढाबळे, सहाय्यक पोलिस निरीक्षक गादेवाड, राखीव पोलिस निरीक्षक पंडित राठोड यांनी पार्थिवदेहावर पुष्प अर्पण केले. तोफांची सलामी दिल्यानंतर शासकीय इतमामात अंत्यसंस्कार करण्यात आले. (प्रतिनिधी) शहीद जवान लक्ष्मण मुंडे यांच्या पार्थिवदेहावर सोमवारी गंगाखेड तालुक्यातील अंतरवेली येथे शासकीय इतमामात अंत्यसंस्कार करण्यात आले. पोलिसदलाच्या वतीने बंदुकीच्या २७ फैरी झाडून सलामी देण्यात आली. जिल्हा पोलिस दलाच्या वतीने शहीद लक्ष्मण मुंडे यांना श्रद्धांजली अर्पण करण्यात आली. कुटुंबीयांना सर्वतोपरी मदत पोलिस अधीक्षक संदीप पाटील म्हणाले, शहीद लक्ष्मण मुंडे यांची कामगिरी अभिमानास्पद आहे. देशसेवेसाठी बलिदान दिलेल्या शहीद मुंडे यांनी आमच्यासमोर आदर्श ठेवला आहे. शहीद लक्ष्मण मुंडे यांच्या कुटुंबीयांना परभणी पोलिस दलातील कर्मचार्‍यांचे एक दिवसाचे वेतन दिले जाईल. त्याचप्रमाणे शासनातर्फे ७५ लाख रुपयांचे अर्थसाह्य देण्यात येईल. परभणी येथील पोलिस मुख्यालयात नव्याने बांधण्यात येणार्‍या सभागृहाला शहीद लक्ष्मण मुंडे यांचे नाव दिले जाईल. लक्ष्मण मुंडे यांच्या कुटुंबातील एका व्यक्तीस पोलिस सेवेत सामावून घेण्यात येईल. तसेच शहीद लक्ष्मण मुंडे हे जिवंत असताना त्यांना जे वेतन, पदोन्नती, भत्ते देय केले जाणार होते, ते त्यांच्या मृत्यू पश्चात त्यांच्या कुटुंबीयांना दरमहा दिले जाणार आहेत, अशी माहिती पोलिस अधीक्षक संदीप पाटील यांनी दिली.