आग बुडाला, कुऱ्हाड झाडाला

बीड : वृक्षतोडीला लगाम लावावा यासाठी कुऱ्हाड बंदी आणण्यात आली. मात्र वृक्षांची कत्तल करणाऱ्यांनी आता नवीच शक्कल अवलंबविली आहे. झाडांच्या बुडाला आग लावून झाड खाली कोसळताच फांद्यासह गायब करण्याचे प्रकार बीड तालुक्यात घडत आहेत. मंगळवारी ‘लोकमत’च्या स्टिंगमध्ये हा प्रकार उघडकीस आला. तालुक्यातील पिंपळनेर रस्त्यावर दुतर्फा लिंब, बाभळीची झाडे आहेत. या झाडांमुळे सावली तर मिळतच आहे. शिवाय रस्त्याच्या वैभवात भर पडत आहे. मात्र काही विघ्नसंतोषी मंडळींनी झाडांवर थेट कुऱ्हाड चालविण्याआधी झाडाच्या बुडाला आग लावून झाडे उद्ध्वस्त करण्याचा सपाटा लावला आहे. रस्त्यालगतचे गवत उन्हाळ्यात वाळते. त्यामुळे महामार्गासह इतर रस्त्यांवर आगीचे प्रकार नेहमीच घडत असतात. याचा फायदा घेऊन जाणीवपूर्वक आग लावण्याचे धक्कादायक प्रकारही आता घडू लागले आहेत. कारण ‘लोकमत’ने केलेल्या स्टिंगमध्ये नागापूर, म्हाळसजवळा शिवारातील झाडांच्या बुडाला आगी लागलेल्या आढळून आल्या. नेमक्या झाडांच्या बुडालाच आग कशी काय लागते? हा प्रश्न आहे. विशेष म्हणजे या झाडांच्या बुडाला आग लागून झाड कोसळले आहे. या झाडांच्या फांद्या व लाकडे कुऱ्हाडीने तोडून ठेवलेलीही आढळून आली आहेत. त्यामुळे झाडे गायब करण्यासाठीच हा सर्व प्रकार घडवून आणला जात असल्याचे स्पष्ट झाले आहे.याबाबत प्रशासनाने कुठलीही ठोस पाऊले उचललेली नाहीत. त्यामुळे झाडांना आग लावून त्याची तस्करी करणाऱ्यांचे बळ वाढत असल्याचे दिसून येत आहे.झाडांची सर्रास कत्तल सुरू असताना ना विभागाचे लक्ष आहे ना बांधकाम विभागाचे. (प्रतिनिधी)रस्त्यालगतच्या झाडांच्या बुंध्यांना आग लागल्यानंतर त्याच्या झळा थेट रस्त्यावर येतात. त्यामुळे रस्त्यावरून ये- जा करणाऱ्या वाहनचालकांना याचा त्रास सहन करावा लागतो. अनेकदा आगीच्या झळा बसू नयेत यासाठी वाहनचालकांना वाटेतच अडकून पडावे लागते. शिवाय या आगीमुळे शेतकऱ्यांनी शेतात साचवून ठेवलेल्या पिकांना, कडब्यांना धोका पोहंचण्याची शक्यता आहे. बीड- पिंपळनेर हा रस्ता सार्वजनिक बांधकाम विभागाच्या अख्त्यारीत आहे. त्यामुळे रस्त्यालगतच्या झाडांची निगा राखण्याचे काम खरे तर त्यांचे आहे. मात्र झाडांच्या बुडाला आगी लावून कत्तल करण्याचे प्रकार घडत असतील तर मी लगेच पथक पाठवून पाहणी करण्यास सांगतो. नेमके काय घडत आहे हे तपासून कारवाई करण्यात येईल.- आर.आर. काळे, विभागीय वन अधिकारी, बीड