अचलेरचे आरोग्य उपकेंद्र आठ महिन्यांपासून कुलूपबंद

अचलेर : ग्रामीण भागातील रूग्णांना किमान प्राथमिक उपचार तरी वेळेवर मिळावेत, या उद्देशाने जिल्हा परिषदेअंतर्गत प्राथमिक आरोग्य केंद्र व उपकेंद्र सुरू करण्यात आली. परंतु, प्रशासनाकडून होत असलेल्या दुर्लक्षामुळे हा उद्देश साध्य होताना दिसून येत नाही. कर्मचार्‍यांअभावी हे उपकेंद्र चक्क आठ महिन्यांपासून कुलूपबंद आहे. त्यामुळे सर्वसामान्य रूग्णांना आष्टा अथवा आलूर येथील प्राथमिक आरोग्य केंद्र गाठावे लागत आहे. तर काही वेळा खाजगी दवाखान्याची पायरी चढावी लागते. लोहारा तालुक्यातील आचलेर येथे रूग्णांची सोय लक्षात घेऊन उपकेंद्र सुरू करण्यात आले. सुरूवातीला हे उपकेंद्र अत्यंत चांगल्या स्थितीत सुरू होते. परंतु, मागील दीड ते दोन वर्षापासून या उपकेंद्रालाच घरघर लागली आहे. येथे आरोग्य सेविकेची दोन आणि एमपीडब्ल्यूचे एक अशी तीन पदे मंजूर आहेत. परंतु, आजघडीला एकही कर्मचारी येथे कार्यरत नाही. त्यामुळे हे उपकेंद्र बंद कुलूपबंद आहे. मागील काही महिन्यांपूर्वी येथे लोखो रूपये खर्च करून प्रसूतीगृह उभारण्यात आले. परंतु, हेही वापराविना पडून आहे. त्यामुळे येथील महिलांना प्रसुतीसाठी खाजगी दवाखाना अथवा आष्टा, आलूर येथील प्राथमिक आरोग्य केंद्राचा मार्ग धरावा लागत आहे. लोकप्रतिनिधींचेही दुर्लक्ष हे उपकेंद्र मागील आठ ते नऊ महिन्यांपासून बंद असतानाही याकडे ना प्रशासन ना लोकप्रतिनिधीचे लक्ष आहे. त्यामुळेच हे उपकेंद्र आजवर सुरू झाले नाही. याबाबत ग्रामस्थांतून तीव्र संताप व्यक्त होत आहे. केवळ आश्वासन उपकेंद्रासाठी तीन पदे मंजूर आहेत. परंतु, सध्या एकही उपलब्ध नाही. याबाबत जिल्हा परिषद आरोग्य विभागाकडे विचारणा केली असता, ‘तातडीने कर्मचारी देण्यात येतील’, असे आश्वासन मागील अनेक दिवसापासून ग्रामस्थ ऐकत आहेत. खाजगी रूग्णालयांवर मदार अचलेर या गावाची लोकसंख्या दहा हजाराच्या घरात आहे. तसेच येथील उपकेंद्राशी परिसरातील अन्य गावेही जोडण्यात आली आहेत. परंतु, उपकेंद्र बंद असल्याने येथील रूग्णांना आलूर, आष्टा येथील प्राथमिक आरोग्य केंद्र वा खाजगी दवाखान्याचा आधार घ्यावा लागत आहे.