महापौरांच्या विरोधातील तक्रारींची पडताळणी करणार प्रशासन

औरंगाबाद : महापौर कला ओझा यांच्या विरोधात नगरसेवक मिलिंद दाभाडे यांनी प्रशासनाकडे केलेल्या तक्रारीच्या अनुषंगाने मुद्यांची पडताळणी करण्यात येईल. त्यानंतर नियमानुसार कारवाई करण्यात येईल. असे पत्र मनपा उपायुक्त रवींद्र निकम यांनी दिल्यानंतर नगरसेवक दाभाडे यांनी उपोषण मागे घेतले. महापौरांनी पदाचा गैरवापर करून प्रवास व पाहुणचार भत्त्यात केलेल्या भ्रष्टाचाराच्या मागणीसह नंदनवन कॉलनी, भीमनगर वॉर्डात पाणीपुरवठा सुरळीत करणे व रस्त्यांची कामे करणे आणि शहरातील सर्व वॉर्डांत समान निधी देण्याच्या मागणीसाठी दाभाडे यांनी पालिकेसमोर उपोषण सुरू केले होते. १३ जून रोजी प्रवास व पाहुणचार भत्त्यात महापौरांनी हात धुवून घेतल्याचा खळबळजनक आरोप नगरसेवक दाभाडे यांनी केला होता. नगरसेवक मिलिंद दाभाडे यांच्यावर गुन्हा दाखल करण्याप्रकरणी शिवसेनेचे शिष्टमंडळ पोलीस आयुक्त राजेंद्र सिंह यांना भेटले होते. तर काँगे्रस आघाडीच्या नगरसेवकांनीदेखील पोलीस आयुक्तांची भेट घेऊन शिवसेनेने खोटी तक्रार केल्याचे निवेदन दिले होते. प्रशासनाची भूमिकामहापौरांच्या विरोधात चौकशी करण्यासंबंधी शासनाकडे तक्रार करावी लागते. मात्र, महापौर त्या पदापूर्वी नगरसेविका आहेत. त्यामुळे प्रशासकीय पातळीवर दाभाडे यांच्या तक्रारीतील तथ्य तपासण्यात येणार आहे. आज सायंकाळी उपायुक्त निकम यांनी प्रशासनातर्फे कारवाईसाठी तक्रारीची पडताळणी करण्यात येणार असल्याचे पत्र देण्यापूर्वी आयुक्तांशी चर्चा केली. त्यानंतर पत्र देण्यात आले.