सिंदेवाही तालुक्यातील विविध समस्यांबाबत जलसंपदामंत्र्यांना निवेदन

महाराष्ट्र सरकारने २०१४ मध्ये दिलेले मुस्लीम आरक्षण पूर्ववत लागू करण्यात यावे. अवकाळी पावसामुळे पिकांवर मावा, तुडतुडा यासारख्या रोगांमुळे पिकांचे मोठ्या प्रमाणात नुकसान झालेले असून, नुकसानीभरपाई देण्यात यावी. सिंदेवाही तालुका दुष्काळग्रस्त घोषित करावे. शेतकऱ्यांचा पीकविमा मंजूर करण्यात यावा, अशी मागणी करण्यात आली आहे. घोडाझरी उपविभागीय कार्यालय नावापुरतेच आहे. पंचायत समितीतील अधिकारी, कर्मचारी मुख्यालयी राहात नाहीत. मोठ्या प्रमाणात अवैध रेती उत्खनन केले जात आहे. स्थायी वैद्यकीय अधिकारीपद रिक्त आहे. ग्रामीण रुग्णालय अनेक समस्यांनी ग्रासलेले आहे. लोणवाही ग्रामपंचायत व इतर गावे जोडून सिंदेवाही नगरपंचायतीला नगरपरिषदेचा दर्जा देण्यात यावा. सिंदेवाही शहरालगत चंद्रपूर-नागपूर मार्ग खड्डेमय झाला आहे त्याची दुरुस्ती व्हावी, सिंदेवाही येथे कृषी विद्यापीठ मंजूर करण्यात यावे, यासह अन्य विविध मागण्यांचा निवेदनात समावेश आहे. याप्रसंगी राष्ट्रवादी काँग्रेसचे तालुकाध्यक्ष दामोधर नन्नावार, किसान सेलचे तालुका अध्यक्ष मनोजकुमार सैनी, राष्ट्रवादी काँग्रेसचे तालुका सचिव वहाबभाई सैयद, अल्पसंख्याक सेलचे तालुका अध्यक्ष मुजीब उल्ला शेख, समाज कल्याण सेलचे तालुका अध्यक्ष बाबुलाल डांगे, लोणवाहीचे शहर अध्यक्ष राहुल गंडाईत, वाकलचे अध्यक्ष पीतांबर नागदेवते, अंबादास कोसे, रंजित निकुरे तसेच तालुका पदाधिकारी व कार्यकर्ते उपस्थित होते.