बिबट्याच्या हल्ल्यात एक ठार

दुर्गापूर: दुर्गापूर वेकोलि कोळसा खाण परिसरात सहा दिवसापूर्वीच बिबट्याने एका इसमाला जखमी केल्याची घटना घडली होती. दरम्यान, रविवारी सकाळी वेकोलि दुर्गापूर खाणीच्या सब स्टेशन मागील परिसरात बिबट्याने एका इसमास ठार केल्याची घटना घडली. यामुळे परिसरात दहशतीचे वातावरण निर्माण झाले आहे. या घटनेतील मृत इसमाची ओळख वृत्तलिहिपर्यंत पटली नव्हती.

रविवारी सकाळी वेकोलि दुर्गापूर कोळसा खाणीतील सबस्टेशनमध्ये कार्यरत कर्मचाऱ्यांना सब स्टेशनच्या मागील भागात एक मृतदेह असल्याचे दिसले. याबाबत लगेच दुर्गापूर पोलिसांना माहिती देण्यात आली. पोलिसांनी घटनास्थळ गाठून मृतदेहाचा पंचनामा केला. यात सदर इसमाला फरफटत जंगलात नेऊन ठार केल्याचे आढळून आले. शिवाय डोक्याला गंभीर जखमा असल्याचेही आढळले. मात्र त्याची ओळख पटली नाही. घटनास्थळावरील परिस्थितीवरून बिबट्याने इसमाला ठार मारल्याचे निष्पन्न झाले आहे. पोलिसांनी मृतदेह शवविच्छेदनाकरिता जिल्हा सामान्य रुग्णालयात पाठविला आहे. ११ जानेवारीला याच परिसरात एका कंत्राटी कामगारांवर बिबट्याने हल्ला करून गंभीर जखमी केल्याची घटना घडली होती. यानंतर रविवारी दुसरी घटना घडल्यामुळे सर्वत्र भीतीचे वातावरण पसरले आहे.