फोटो-०४सीपीपीएच१६ - शर्विलचे आपल्या आईवडिलांसोबतचे संग्रही छायाचित्र.
वरोरा(चंद्रपूर) : डाॅ. शीतल आमटे-करजगी यांच्या मृत्यूला आज पाच दिवस झाले. डाॅ. शीतलचा सहा वर्षीय मुलगा शर्विलचा आज वाढदिवसही होता. दरवर्षी आई डाॅ. शीतल वृक्ष लागवड करून आपल्या चिमुकल्याचा वाढदिवस साजरा करायची. आज शर्विलने आईच्या आठवणीत वृक्ष लावून आपला वाढदिवस साजरा केला. याप्रसंगी आनंदवनातील वातावरण भावूक आणि नि:शब्द होते.
वृक्ष लागवड केल्यानंतर शर्विल आपल्या आईच्या समाधीजवळ गेला. त्यावेळी त्याच्या डोळ्यात आसवे होती. हातात जास्वंदाचे फूल घेऊन बोबड्या शब्दात मम्मा म्हणत त्याने आपल्या आईला ते अर्पण केले. या भावूक क्षणाचे साक्षीदार त्याचे वडील गौतम करजगी, आजोबा डाॅ. विकास आमटे, आजी भारती आमटे, सुहासिनी करजगी व शिरीष करजगी यांच्यासह आनंदवनातील परिवार होता. शर्विल आईविना पोरका झालेला आहे. तो सतत आईची आठवण करतो आहे. त्याचे मन कुठल्याही गोष्टीत रमत नसल्याने त्याचे वडील गौतम करजगी, आजी सुहासिनी करजगी व शिरीष करजगी हे त्याला या आठवणीतून काही काळासाठी का होईना बाहेर काढण्यासाठी नागपूरला घेऊन गेले असल्याची माहिती मिळाली.
आनंदवन पूर्वपदावर येत असले तरी कुणाच्याही चेहऱ्यावर आनंद दिसला नाही. सारे काही संपल्यागत आनंदवनातील मंडळी आपापली कामे करताना दिसून आली. आनंदवनात नीरव शांतता बघायला मिळाली.