घनश्याम नवघडे
नागभीड : नागभीड तालुक्यातील ग्रामपंचायतींच्या सरपंचपदाचे आरक्षण जाहीर झाल्यानंतर सरपंचपदाच्या दावेदारांनी दगाफटका होऊ नये, यासाठी आपल्या सदस्यांना सहलीवर पाठविल्याची माहिती आहे.
ज्या ठिकाणी सरपंचपद हे सर्वसाधारण आणि नामाप्रसाठी आहे. अशाच ठिकाणी ही खबरदारी घेण्यात येत असल्याची माहिती आहे.
नागभीड तालुक्यात ५६ ग्रामपंचायती आहेत. यातील ४३ ग्रामपंचायतींच्या निवडणुका नुकत्याच पार पडल्या. या ग्रा.पं.चे सरपंचपदाचे आरक्षण जाहीर करण्यात आल्यानंतर काही संवेदनाशील गावांत राजकीय हालचालींना गती आली आहे.
गेली तीन चार वर्षे सरपंचपदाची निवड ही थेट लोकांमधून होत होती. त्यामुळे एकदा निवडणूक पार पडली की, गावातील वातावरण शांत व्हायचे. मात्र, वर्षभरापूर्वी सत्तेवर आलेल्या सरकारने यात बदल करून सरपंच हे पद सदस्यांमधून निवडून देण्याचा कायदा संमत केला. त्यामुळे निवडणूक पार पडल्यानंतर एका गावात अनेक व्यक्ती सरपंचपदाची दावेदारी सांगत असल्याने काही गावात पेच निर्माण होत आहेत.
एवढेच नाहीतर विरोधकांकडून सदस्यांना पदाचे, पैशाचे आमिष दाखविण्यात येत असल्याची माहिती असून या प्रकाराने गावातील गटप्रमुखांची भंबेरी उडत आहे. यातूनच सदस्यांना कोणाच्या संपर्कात न ठेवता बाहेर सहलीवर घेऊन जात असल्याची माहिती आहे.
माहितीनुसार नागभीड तालुक्यातील एका सर्वात मोठ्या ग्रामपंचायतीचे १० सदस्य सदस्यपदाचा निकाल लागल्यापासूनच दगाफटका नको म्हणून सहलीवर गेले आहेत. तर पारडी बाळापूर जि.प.क्षेत्रातील एका मोठ्या गावात विरोधकांकडून घुसखोरी होत असल्याची कुणकुण लागताच तेथील गटप्रमुखाने सोबत निवडून आलेल्या सदस्यांना सहलीवर पाठवून दिल्याची माहिती आहे. असेच प्रकार आणखी काही गावातही आहेत. ज्या सर्वसाधारण व जनरल नामाप्रचे आरक्षण आले आहे, अशाच गावात हे प्रकार सुरू असल्याचे एका राजकीय जाणकाराने सांगितले. जेव्हा सरपंच निवडणुकीच्या नोटिसा मिळणे सुरू होतील तेव्हा सहलीचे हे प्रकार आणखी वाढतील, असेही या जाणकाराने सांगितले.
बाॅक्स
नवेगाव पांडवचे आरक्षण
नवेगाव पांडव ग्रामपंचायतीची निवडणूक अडीच वर्षांपूर्वीच पार पडली असली तरी याही ग्रामपंचायतीचे आरक्षण काढण्यात आले आणि ते अनु.जमाती महिलेसाठी निघाले. नवेगाव पांडव येथे अनु.जमातीच्या व्यक्तीचे केवळ एक-दोन घरे असून मतदारही नगण्य आहेत. या आरक्षणाविरोधात जिल्हाधिकारी यांच्याकडे अपील करणार असल्याची माहिती नागभीड पंचायत समितीचे सदस्य व नवेगाव पांडवचे रहिवासी संतोष रडके यांनी दिली.