ट्रकची अँपेला धडक; दोन ठार

भाविकांच्या अँपेला भरधाव वेगात असलेल्या एका ट्रकने धडक दिल्याने दोघांचा जागीच मृत्यू झाल्याची घटना घडली.

बुलडाणा : नवस पूर्ण करून तालुक्यातील वरवंड येथील नातेवाईकांच्या घरी जात असलेल्या भाविकांच्या अँपेला भरधाव वेगात असलेल्या एका ट्रकने धडक दिल्याने दोघांचा जागीच मृत्यू झाल्याची घटना १२ जून रोजी रात्री १0 वाजेदरम्यान घडली. या अपघातात एक इंडिका कारही क्षतिग्रस्त झाली आहे.
याबाबत मिळालेल्या माहितीनुसार, साखरखेर्डा पोलिस स्टेशन अंतर्गत येणार्‍या उमनगाव येथील खिल्लारे परिवाराचे सदस्य नवस पूर्ण करण्यासाठी एमएच-२८ एबी-१२९९ क्रमांकाच्या मालवाहू अँपेने बुलडाणा तालुक्यातील र्मदडी घाटातील देवीच्या मंदिरात गेले होते. नवस पूर्ण झाल्यानंतर सर्व खिल्लारे परिवार अँपेने बुलडाणा तालुक्यातील वरवंड येथील नातेवाईकांकडे रात्री मुक्कामासाठी निघाले; दरम्यान बुलडाणा-खामगाव मार्गावरील वरवंड फाट्याजवळील एका थाब्यावर पाणी पिण्यासाठी अँपे थांबविण्यात आला. यावेळी बुलडाणा येथून खामगावकडे १0 चाकाचे एमएमच-0४ टीआरएल-८२६ क्रमांकाच्या (चेचिस) ट्रकने फाट्याजवळ असलेल्या एमएच-२८ व्ही-७६८२ क्रमाकांच्या इंडिगो कारला मागून धडक दिली. या अपघातात इंडिगो कार रस्त्याच्या बाजूला फेकल्या गेली.
यावेळी अनियंत्रित झालेला ट्रक सरळ अँपेवर धडकला. यावेळी अँपेतून उतरणारे गौतम परमेश्‍वर खिल्लारे वय ९ व प्रकाश रामराव खिल्लारे वय ५५ यांचा घटनास्थळी मृत्यू झाला. याप्रकरणी ग्रामीण पोलिसांनी ट्रक चालक राहत मसीहा रहेमत मसीहा रा.जमशेदपूर याच्याविरूद्ध गुन्हा दाखल करून त्यास अटक करण्यात आली आहे.

** सैलानी जाणार्‍या गाडीचा अपघात; नऊ जण जखमी

मेहकर : सैलानी बाबाच्या दर्शनासाठी जात असलेल्या भाविकांच्या वाहनाचा अपघात होऊन नऊ जण जखमी झाल्याची घटना १३ जून रोजी सकाळी १0 वाजताच्या सुमारास मेहकर-चिखली रस्त्यावरील नागझरीच्या उतारात घडली. यासंदर्भात सविस्तर वृत्त असे की, जिंतूर जिल्ह्यातील येलदरी येथे एकत्र लग्नसोहळ्यासाठी काही मंडळी एम.एच.२२ एच.२३५६ क्रमांकाच्या वाहनाने आले होते; मात्र सर्वांनी बुलडाणा जिल्ह्यातील सैलानी बाबा यांच्या दर्शनासाठी जाण्याचा निर्णय घेतला. हे सर्व जण सैलानीला जात असताना मेहकर-चिखली रस्त्यावर नागझरीच्या उतारात या भाविकांच्या वाहनचालकाने समोरुन जाणार्‍या महेंद्रा पिकअपला ओव्हरटेक करण्याचा प्रयत्न केला; दरम्यान महेंद्र पिकअपचा जोरदार धक्का भाविकांच्या वाहनाला लागला. त्यामध्ये वाहन चक्क तीन पलट्या घेऊन उताराच्या खड्डय़ात पडले. त्यात रवींद्र शंकर डिंगणे (५0), सुषमा रविंद्र डिंगणे (४२), ज्ञानेश्‍वर रविंद्र डिंगणे (१८), अख्तर युनूस मुलाणी (४0) सर्व रा.श्रीपूर जि.सोलापूर, मिलिंद थोरात, ऐश्‍वर्या गजानन जंत्रे (१८) रा.परळी, सुरेखा शिवाजी बारगजे (३५), राजेश्‍वर शिवाजी बारगजे सर्व रा.नेकनुर जि.बीड आदी जखमी झाले. आ.डॉ.संजय रायमुलकर हे त्याच रस्त्याने मेहकरकडे येत असताना त्यांनी या अपघातातील सर्व जखमींना तत्काळ ग्रामीण रुग्णालयात दाखल केले. या जखमींपैकी वाहनचालक मिलिंद थोरात व रवींद्र डिंगणे यांची प्रकृती गंभीर असल्याने त्यांना पुढील उपचारार्थ औरंगाबाद येथे हलविण्यात आले आहे.