रेतीची राजरोस तस्करी

महसूल विभागाच्या दुर्लक्षामुळे तालुक्यात अवैध रेती वाहतूक जोमात सुरू आहे.

मेहकर : महसूल विभागाच्या दुर्लक्षामुळे तालुक्यात अवैध रेती वाहतूक जोमात सुरू आहे. रेती तस्करांना प्रशासनाचे अभय निर्माण झाल्याने रेती माफीयांना तालुक्यात उधान आले आहे. अवैध रेतीची राजरोस तस्करी केल्या जात असल्याने शासनाचेही मोठय़ा प्रमाणात नुकसान होत आहे. मेहकर तालुक्यात पैणगंगा नदीपात्रातून व सिंदखेडराजा तालुक्यातील खडकपुर्णा नदी पात्रातून अवैध रेती वाहतूक केली जात आहे. या नदीमध्ये पाच ते २५ फुट खोल रेतीसाठा आहे. परंतू, महसुल खात्याचे काही अधिकारी मलिदा गोळा करण्यात व्यस्त आहेत. महसूल विभागाच्या दुर्लक्षामुळे पैनगंगा व खडकपूर्णा नदीपात्रातून अवैध रेती उत्खननाला पेव फुटले आहे. रेती ठेकेदारांवर राजकीय कृपाछत्र असल्यामुळे मोठय़ा प्रमाणात रेतीची तस्करी वाढली असून, खुले आम अवैध रेतीची वाहतूक केली जात आहे. रेती वाहतूक करतांना रेती झाकुन नेल्या जात नसल्याने रेतीचे कण उडुन अपघाताच्या घटनाही घडत आहेत. रात्रीच्यावेळी अवैध रेतीची तस्करी करण्याकरीता विना नंबर प्लेट वाहनाचा उपयोग रेती माफीया करीत आहेत. रेती वाहतूक करणार्‍या अनेक वाहन चालकांकडे रेती वाहतूकीचा परवाना नसतोच, शिवाय त्यांच्याकडे वाहन चालविण्याचाही परवाना नसतो. तसेच एकाच पावतीवर खाडाखोड करुन अनेकवेळा अवैध रेतीची वाहतूक केली जात असल्याचे धक्कादायक वास्तव समोर येत आहे. या प्रकाराला वेळीच आळा घालण्यासाठी वरिष्ठांनी उपाय योजना करणे गरजेचे असून, परिवहन कार्यालयांनी सुद्धा या गंभीर बाबीकडे लक्ष देण्याची मागणी होत आहे. अवैध रेती तस्करी संदर्भात तालुक्यातील महसुल विभागातील कर्मचार्‍यांना पाठबळ देण्याकरीता पोलिस बंदोबस्तात सदर कारवाई होणे गरजेचे आहे. दिवसाच्या सकाळी ६ ते सायंकाळी ६ या वेळेव्यतिरीक्त नदीपात्रात दोन मिटर पेक्षा जास्त वाळू उपसा करण्यास मनाई असतांनाही, तसे न होता येथे सर्रास नियमाला मुठमाती दिल्या जात आहे. रेतीची वाहतूक करतांना वाळू झाकून नेणे बंधनकारक असतांना कोणीही हे नियम पाळत नाहीत. तसेच नियमबाह्य अधिक प्रमाणात रात्रीच्या वेळीच रेतीची वाहतूक मोठय़ा प्रमाणात होत आहे. वरिष्ठांनी रेती तस्करींवर लक्ष देऊन यावर अंकुश बसविण्यासाठी विशिष्ट पथकांची निर्मीती करणे गरजेचे आहे.