ग्रामीण रुग्णालय शस्त्रक्रियेसाठी सज्ज

मेहकर ग्रामीण रुग्णालयात एका १५ वर्षीय विद्यार्थिनीवर अँपेन्डिक्सची यशस्वी शस्त्रक्रिया करण्यात आल्याने या रुग्णालयात पोटाच्या शस्त्रक्रियेचा मार्ग मोकळा झाला आहे.

मेहकर : स्थानिक ग्रामीण रुग्णालयात एका १५ वर्षीय विद्यार्थिनीवर अँपेन्डिक्सची यशस्वी शस्त्रक्रिया करण्यात आल्याने या रुग्णालयात पोटाच्या शस्त्रक्रियेचा मार्ग मोकळा झाला आहे. शासकीय आरोग्य तपासणी मोहिमेंतर्गत तालुक्यातील जानेफळ येथील सरस्वती विद्यालयातील नववीची विद्यार्थिनी अंजली गजानन सपकाळ हिस अँपेन्डिक्सचा त्रास असल्याचे वैद्यकीय अधिकार्‍यांच्या निदर्शनास आले होते. मेहकर ग्रामीण रुग्णालयात आतापर्यंत ही शस्त्रक्रिया होत नव्हती. मात्र येथील डॉ. मुंदडा यांना आरोग्य विभागाने मानद वैद्यकीय अधिकारी म्हणून नियुक्त केले व डॉ. मुंदडा, भूलतज्ज्ञ डॉ. उमेश जाधव, वैद्यकीय अधीक्षक डॉ. पंडित यांनी अंजलीवर ८ मे रोजी अँपेन्डिक्सची यशस्वी शस्त्रक्रिया केली. त्यामुळे मेहकर ग्रामीण रुग्णालयात आता शासकीय खर्चात पोटाच्या शस्त्रक्रिया करण्याचा मार्ग मोकळा झाला आहे. सध्या ग्रामीण रुग्णालयात डॉ. लखोटिया सिझरकरिता, डॉ. अनिल गाभणे (हृदयरोगतज्ज्ञ व सर्व आजार) हेसुद्धा मानद अधिकारी म्हणून सेवा देतात. डोळ्याच्या शस्त्रक्रिया वैद्यकीय अधीक्षक डॉ. पंडित करतात. रुग्णांनी या सर्व सोयींचा फायदा घ्यावा, असे आवाहन आरोग्य विभागाने केले असून, या रुग्णालयास उपजिल्हा रुग्णालयाचा दर्जा त्वरित मिळावा, जनतेची मागणी आहे.