कोरोना विषाणूचा मोठ्या प्रमाणात प्रसार होत आहे. त्या दृष्टिकोनातून योग्य त्या प्रतिबंधात्मक उपाययोजना करण्यात येत आहेत. कोरोना विषाणूचा संसर्ग टाळण्यासाठी पवित्र रमजान ईदकरिता मुस्लीम बांधवांनी नियमित नमाज पठण, तरावीह तसेच इफ्तारसाठी मशिदीमध्ये अथवा सार्वजनिक ठिकाणी एकत्र न येता सर्व धार्मिक कार्यक्रम आपापल्या घरातच साजरे करून ब्रेक द चेन आदेशाचे काटेकोर पालन करावे. नमाज पठणाकरिता मशिदीत, मोकळ्या जागेत एकत्र येऊ नये, असे आवाहनही जिल्हा प्रशासनाने केले आहे. कोविड या विषाणूच्या वाढत्या संसर्गास प्रतिबंध करण्याच्या आनुषंगाने राज्यात कलम १४४ लागू आहे. त्यामुळे संचारबंदी कालावधीत फेरीवाल्यांनी रस्त्यावर स्टॉल लावू नये. तसेच नागरिकांनी विनाकारण रस्त्यावर फिरू नये. रमजान ईदनिमित्ताने कोणत्याही प्रकारे मिरवणुका, धार्मिक, सामाजिक, सांस्कृतिक अथवा राजकीय कार्यक्रमांचे आयोजन करण्यात येऊ नये. धार्मिक स्थळे बंद असल्याने मुस्लीम समाजातील धर्मगुरू, सामाजिक कार्यकर्ते, राजकीय नेते आणि स्वयंसेवी संस्थांच्या माध्यमातून पवित्र रमजान महिना साधेपणाने साजरा करण्याच्या आनुषंगाने जनजागृती करण्यात यावी. रमजान ईदच्या दिवशी नियमांचे काटेकोरपणे पालन करणे आवश्यक आहे. मास्क व सॅनिटायझरचा वापर करणे अत्यंत आवश्यक आहे. त्यानुसार नियम पाळण्याचे आवाहनही केले आहे.
कोविडच्या पार्श्वभूमीवर नियमांचे बंधन
कोवीड-१९ या विषाणूचा प्रादुर्भाव रोखण्यासाठी शासनाच्या मदत व पुनर्वसन, आरोग्य, पर्यावरण, वैद्यकीय शिक्षण विभाग तसेच संबंधित महापालिका, पोलीस, स्थानिक प्रशासन यांनी विहित केलेल्या नियमांचे अनुपालन करणे बंधनकारक आहे. तसेच राज्य शासनाने जारी केलेल्या सर्व नियमांचे बंधनकारक केले आहेत.