पीककर्जासाठी बँकेत हेलपाटे

मेहकर तालुक्यातील प्रकार; अनेक शेतकरी पीककर्जाच्या प्रतीक्षेत.

मेहकर (जि. बुलडाणा) : स्थानिक सेंट्रल बँकेमध्ये गेल्या एक महिन्यापासून शेतकरी पीककर्जासाठी चकरा घालत आहेत; मात्र सेंट्रल बँकेच्या ढिसाळ कारभारामुळे अनेक शेतकरी पीककर्जाच्या प्रतीक्षेत आहेत. गत एक महिन्यापासून १४ गावांतील शेतकरी कर्ज घेण्यासाठी बँकेमध्ये चकरा घालत आहेत; मात्र बँक व्यवस्थापक व कर्मचारी यांच्या निष्काळजीपणामुळे अनेक शेतकरी कर्जापासून वंचित आहेत. व्यवस्थापक हे शेतकर्‍यांना व्यवस्थित वागणूक देत नसल्यामुळे शेतकर्‍यांची बाजू मांडण्यासाठी कैलास राऊत, तंटामुक्ती अध्यक्ष राजेश मगर व शेतकरी विनोद फलके हे व्यवस्थापकाकडे गेले असता, व्यवस्थापकाने त्यांची कोणतीही बाजू ऐकून न घेता लोटपाट करून बँकेच्या बाहेर काढल्याची तक्रार त्यांनी जिल्हाधिकार्‍यांकडे दिली आहे. यावेळी मेहकरचे ठाणेदार राठोड हे बँकेमध्ये आले होते. त्यांनीही शेतकर्‍यांची बाजू ऐकून घेतली नसल्याची तक्रार आहे. बँक व्यवस्थापकावर तात्काळ कारवाई न केल्यास ६ जुलै रोजी आत्मदहन करू, असा इशारा कैलास राऊत, राजेश मगर, विनोद फलके यांनी २५ जून रोजी मेहकर उपविभागीय अधिकारी यांच्याकडे निवेदनाद्वारे दिला आहे.