काँग्रेसचे आंदोलनात पहिले पाऊल

रेल्वे भाडेवाढ : शेगाव तहसीलवर मोर्चा

शेगाव : भाजप सरकारने रेल्वेच्या प्रवासी भाड्यात १४.२ तर मालभाड्यात ६.५ टक्के वाढ करण्याचा निर्णय घेतल्याच्या निषेधार्थ आज शनिवारी भारतीय राष्ट्रीय काँग्रेस कमिटीच्यावतीने रेल्वे स्थानकावर निषेध व्यक्त करुन तहसील कार्यालयावर भव्य मोर्चा काढण्यात आला. १0 वर्षानंतर प्रथमच काँग्रेस पक्षाच्या पदाधिकार्‍यांना सरकारविरोधी मोर्चा काढण्याची ही वेळ असल्याने या मोर्चात कार्यकर्ते व पदाधिकार्‍यांनी मोठय़ा संख्येने सहभाग दर्शविला.
केंद्र सरकारने काल एका पत्रकार परिषदेत रेल्वेची भाडेवाढ जाहीर केली. या निर्णयाचा निषेध आणि भाडेवाढ त्वरित मागे घेण्याच्या मागणीसाठी आज शनिवारी जिल्हा काँग्रेस कमिटीचे अध्यक्ष विजय अंभोरे यांच्या नेतृत्वात आणि पक्षनेते रामविजय बुरुंगले, तबस्सुम हुसेन यांच्या मार्गदर्शनाखाली शेगावातील रेल्वे स्थानकावर काँग्रेस पदाधिकार्‍यांचा भव्य मोर्चा धडकला. ह्यमोदी सरकार हाय.. हाय.. भाडेवाढ मागे झालीच पाहिजे, ये तो अभी झाकी है पिक्चर अभी बाकी है.. अशा घोषणा यावेळी देण्यात आल्या. निदर्शने करताना कार्यकर्त्यांच्या हाती मोदी सरकार विरोधी आणि भाडेवाढ मागे घेण्यासंदर्भात फलके होती. यानंतर काँग्रेसचा हा निषेध मोर्चा तहसीलवर धडकला.
याठिकाणी तहसीलदार डॉ.रामेश्‍वर पुरी यांच्याशी शिष्टमंडळाने चर्चा केल्यानंतर निवेदन सादर करण्यात आले.
केंद्र शासनाने बजेट सादर करण्यापूर्वीच रेल्वे भाड्यांमध्ये भरमसाठ वाढ करुन जनतेवर अन्याय केलेला असून, सदर भाडेवाढ त्वरित मागे घ्यावी अन्यथा जिल्हाभरात तीव्र आंदोलने छेडण्याचा इशारा या निवेदनाद्वारे देण्यात आला.