प्लास्टिक गोळा करणे ‘त्याच्या’ उपजीविकेचे साधन

एका २५ वर्षीय युवकाने बेरोजगारीवर मात करत प्लास्टिकच्या टाकाऊ पिशव्या कारखान्यात विकण्याचा आगळावेगळा उद्योग सुरू करून त्यालाच आपल्या उपजीविकेचे साधन बनविले आहे.

लोणार : एका २५ वर्षीय युवकाने बेरोजगारीवर मात करत प्लास्टिकच्या टाकाऊ पिशव्या बाजारपेठेतून विकत घेऊन त्या कारखान्यात विकण्याचा आगळावेगळा उद्योग सुरू करून त्यालाच आपल्या उपजीविकेचे साधन बनविले आहे. प्लास्टिक पिशव्यांचा वापर दिवसेंदिवस वाढतच आहे. कापडी पिशव्या हद्दपार झाल्याने विविध प्रकारच्या प्लास्टिक पिशव्यांचा वापर मोठय़ा प्रमाणावर होऊ लागला आहे. मग त्यामध्ये किराणा दुकान, औषधीचे दुकान, कापड दुकान, हार्डवेअर, स्टेशनरी, हॉटेल किंवा भाजीपाला यासारख्या व्यावसायिकांचे प्लास्टिक पिशवी एक अविभाज्य अंगच बनले आहे. प्लास्टिक पिशव्यांच्या वाढत्या वापरामुळे अनेक शहरांना विविध समस्यांना सामोरे जावे लागते. यामध्ये शहरातील सांडपाणी वाहून नेणार्‍या नाल्यांमध्ये प्लास्टिक पिशव्या अडकल्यामुळे मुंबईत हाहाकार माजला होता. त्यावरून महाराष्ट्र शासनाने प्लास्टिक पिशव्यांवर बंदी आणण्याचा प्रयत्नदेखील केला; परंतु याच प्लास्टिक पिशव्यांचा आजही बंदी असताना राजरोसपणे वापर होत आहे. त्यातून अनेक बेरोजगार युवकांच्या हाताला काम देऊन पोटाची खळगी भागविण्यासाठी या प्लास्टिक पिशव्या सहाय्यभूत ठरत आहेत. उत्तर प्रदेशातील उमरीयागंज येथील नियाजखान हा युवक आपल्या इतर भावंडासह बुलडाणा, जळगाव, मलकापूर, जालना, परभणी, लोणार, मेहकर, चिखली, देऊळगावराजा, मालेगाव, रिसोड, वाशिम यासारख्या मोठमोठय़ा शहरातील बाजारपेठेतून प्लास्टिकच्या टाकाऊ पिशव्या २२ रुपये किलो दराने खरेदी करतो. यामधून नियाजखान हा महिन्याकाठी जवळपास ५0 हजार रुपये कमाई करीत आहे.