पाच महिन्यात ७१ अपघात महामार्गावर ३५ व्यक्तींचा मृत्यू

राष्ट्रीय महामार्ग क्रमांक ६ वर मागील पाच महिन्यात ७१ अपघात झाले आहेत. यामध्ये ३५ जणांचा मृत्यू तर ७४ जण गंभीररीत्या जखमी झाले.

खामगाव : शहराजवळून जाणार्‍या मुंबई-कोलकता राष्ट्रीय महामार्ग क्रमांक ६ वर मागील पाच महिन्यात ७१ अपघात झाले आहेत. यामध्ये ३५ जणांचा मृत्यू तर ७४ जण गंभीररीत्या जखमी झाले. २८ जणांना किरकोळ दुखापत झाली आहे. त्यामुळे हा महामार्ग मृत्यूचा सापळा बनला आहे.
खामगाव उपविभागामध्ये असलेल्या महामार्गात खामगाव ते अकोला रस्ता असून, खामगाव ते शेगाव हा मुख्य रस्ता आहे. या रस्त्यावरती अपघाताची मालिकाच सुरु आहे. प्रत्येक दिवशी अपघात झाल्याची माहिती मिळते. यामुळे महामार्गावरील सुरक्षेचा प्रश्न गंभीर झाला आहे.
या रस्त्यावरील अपघातासाठी वाहनचालकांच्या चुका, वाहनांची दुरवस्था, रस्त्यावर मोकाट फिरणारी जनावरे, महामार्गावर बिनदिक्कतपणे धावणारे ट्रॅक्टर, ऑटोरिक्षा व इतर तत्सम वाहने, रस्त्यावर चुकीच्या पद्धतीने उभी केलेली वाहने, सहज उपलब्ध होणारे वाहन चालक परवाने, रस्त्यांवर आवश्यक त्या चिन्हांचा अभाव, रस्ता सुरक्षिततेचा अभाव महामार्गावर असलेले अपघाती वळणे, रस्त्यावरील खड्डे, अनेक ठिकाणी गतिरोधक टाकलेले आहेत; मात्र त्या ठिकाणी पांढरे पट्टे किंवा सूचना फलक लावलेले नाहीत, यामुळेही अपघात वाढत आहेत.
शासनाने विविध कायदे करुन अपघात रोखण्याचे प्रयत्न केले आहेत; मात्र तरीदेखील हे अपघात कमी होण्याऐवजी वाढत आहेत. दररोज वाढणारी वाहनांची संख्या चिंतेचा विषय बनत आहे. महामार्गावर वाहन चालवताना वेगावर नियंत्रण ठेवण्यासाठी कोणतीच यंत्रणा आपल्याकडे नाही. प्रत्येक ठिकाणी वाहतूक पोलिस नियुक्त करणे शक्य नाही. स्वत: वाहनचालकानेच काळजी घेण्याची गरज आहे. भरघाव वेगाने जाणार्‍या वाहनांवर वेळोवेळी दंडही केला जातो. अनेक व्यक्ती कायदा मोडीत काढण्याचा प्रयत्न करतात. अपघात कितीही मोठा असला तरी त्यामध्ये लगेच जामीन मिळत असल्यामुळे त्याकडे गंभीरपणे पाहायला कोणीच तयार नाही.

** भरधाव वेगाने वाहन चालवणे, या कारणामुळे अनेक अपघात होऊन काही जण आपला जीव गमवतात तर काही जण कायमचे जायबंदी होत आहेत.

** शासनाने विविध कायदे करुन अपघात रोखण्याचे प्रयत्न केले आहेत; मात्र तरीदेखील हे अपघात कमी होण्याऐवजी वाढत आहेत.

** रस्त्यांवर आवश्यक त्या चिन्हांचा अभाव, रस्ता सुरक्षिततेचा अभाव महामार्गावर असलेले अपघाती वळणे, रस्त्यावरील खड्डे, अनेक ठिकाणी गतिरोधक टाकलेले आहेत; मात्र त्या ठिकाणी पांढरे पट्टे, वा सूचना फलक लावलेले नाहीत, यामुळेही अपघात वाढत आहेत.