तुमसर बाजार समितीत शेतमालाची विक्री आता थेट वजनकाट्यावर

तुमसर बाजार समितीत तुमसर आणि मोहाडी येथील शेतकरी आपले धान्य विक्रीसाठी आणतात. परंतु वेळेवर विक्री होण्याची कोणतीच खात्री नसते. आता तर कोरोनाचे संकट घोंघावत आहे. याचा परिणाम बाजारपेठेवरही झाला आहे. दोन महिन्यांपासून बाजार समितीत धान्याची आवक मंदावली आहे. मात्र अचानक दोन दिवसांपासून शेतकºयांनी मोठ्या प्रमाणात आपले धान्य येथे आणणे सुरु केले आहे.

ठळक मुद्देकोरोना पार्श्वभूमीवर निर्णय : धान्य राशीच्या पसाऱ्यातून मुक्ती

लोकमत न्यूज नेटवर्क
मोहाडी : कोरोनाचे संकट सर्वत्र घोंघावत आहे. विविध ठिकाणी अडचणी येत आहेत. शेतकऱ्यांनाही शेतमाल विकताना अडचणींचा सामना करावा लागतो. यावर मात करण्यासाठी तुमसर कृषी उत्पन्न बाजार समितीने निर्णय घेत आता थेट वजनकाट्यावरच शेतमालाची विक्री केली जाणार आहे. त्यामुळे धान्याच्या राशी बाजार समितीच्या आवारात दिसणार नाही.
तुमसर बाजार समितीत तुमसर आणि मोहाडी येथील शेतकरी आपले धान्य विक्रीसाठी आणतात. परंतु वेळेवर विक्री होण्याची कोणतीच खात्री नसते. आता तर कोरोनाचे संकट घोंघावत आहे. याचा परिणाम बाजारपेठेवरही झाला आहे. दोन महिन्यांपासून बाजार समितीत धान्याची आवक मंदावली आहे. मात्र अचानक दोन दिवसांपासून शेतकऱ्यांनी मोठ्या प्रमाणात आपले धान्य येथे आणणे सुरु केले आहे. कोरोनाचा धसका असताना शेतकऱ्यांची बाजारात मोठी गर्दी दिसत आहे. त्यावर बाजार समिती प्रशासनाने उपाय म्हणून शेतकऱ्यांचे धान्य तात्काळ खरेदी करण्यासाठी उपाययोजना केली आहे. त्यामुळे थेट वजनकाट्यावर धान्य मोजून तेथे खरेदी केले जाणार आहे.
बाजार समितीने यासाठी वजनकाट्याची सुविधा उपलब्ध करून दिल्याची माहिती सभापती भाऊराव तुमसरे, संचालक अरविंद कारेमोरे, अनिल जिभकाटे यांनी दिली आहे. धान्याचा नमुना घेतल्यानंतर धान्य भरलेले वाहन वजनकाट्यावर नेले जाईल. बाजाराच्या आवारात धान्याच्या राशी पसरणार नाही. व्यापारी व शेतकरी या दोघांनाही त्याचा फायदा होईल. इच्छूक शेतकऱ्यांनी शेतमाल विक्रीसाठी आणताना गर्दी करू नये. जिल्हा प्रशासनाने दिलेल्या अटी व शर्तींचे पालन करावे असे आवाहन बाजार समितीच्या वतीने करण्यात आले आहे.

शेतकऱ्यांची गैरसोय होऊ नये. कोरोना संकटाच्या काळात शेतकऱ्यांचे धान्य तात्काळ विकले जावे यासाठी बाजार समितीने सुविधा उपलब्ध करून दिली आहे. यामुळे बाजारातील गर्दीवर आळा बसेल. व्यापारी तसेच शेतकऱ्यांचा खरेदी विक्रीचा वेळ वाचणार आहे. प्रत्येकाने स्वयंशिस्त पाळून येथे धान्याची विक्री करावी. स्वत:चा आणि दुसऱ्याचा जीव धोक्यात घालू नये.
-मीनाक्षी वासनिक, प्रभारी सचिव कृषी उत्पन्न बाजार समिती तुमसर-मोहाडी