गोंडसावरीतील प्रकार : शेतकऱ्यांचा वाली कोण?
लाखनी : खरीप हंगामातील धानाची अद्याप उचल करण्यात न आल्याने गोंडसावरीतील शेतकऱ्यांसमोर मोठे आर्थिक संकट उभे ठाकले आहे. ऐनवेळी तालुका खरेदी-विक्री संघाने धान मोजणीस असमर्थता दाखवल्याने तब्बल साडेतीन हजार पोती धान सडण्याच्या मार्गावर आहे.
शेतकऱ्यांनी कष्टाने पिकविलेले धान खरेदी करण्याची जबाबदारी सरकारची आहे. त्यासाठी पणन महासंघाद्वारे धान खरेदी केली जाते. मात्र डिसेंबर महिन्यात टोकन देऊनही गोंडसावरीतील शेतकऱ्यांच्या धानाची अद्याप उचल करण्यात आलेली नाही. स्थानिक गुदामाची क्षमता तोकडी असल्याने एक दिवसाच्या खरेदीतच ते फुल्ल झाले. आता गावकऱ्यांनीच गुदाम उपलब्ध करून द्यावे, त्यानंतरच आम्ही धान खरेदी करू अशी आडमुठी भूमिका तालुका खरेदी-विक्री संघाने घेतली आहे. येथील शेतकऱ्यांना आजपर्यंत धान खरेदीचे आश्वासन देण्यात आले, मात्र ऐनवेळी ४० किमी दूर असलेल्या एका केंद्रावर खरेदी करू शकतो, असे सांगण्यात आले.
सर्वसामान्य शेतकऱ्यांना हे परवडण्यासारखे नाही.
या समस्येवर तोडगा काढण्यासाठी गावकऱ्यांनी अनेकदा पणन कार्यालयाचे उंबरठे शिजवले, मात्र कोणत्याही अधिकाऱ्याने दाद दिली नाही. त्यामुळे आता या ग्रामस्थांना न्याय देणार कोण, असा प्रश्न निर्माण झाला आहे.
...तर आंदोलन करणार
गोंडसावरीत नव्वद टक्के अल्पभूधारक शेतकरी आहेत. शेती आणि मोलमजुरी करून ते आपल्या संसाराचा गाडा हाकतात. अशात शेतात राबून पिकवलेले सोन्यासारखे धान अद्याप सरकारने खरेदी न केल्याने गावकऱ्यांमध्ये संताप आहे. लवकरात लवकर यावर तोडगा न निघाल्यास सरकारविरोधात आंदोलन करण्याचा इशारा देण्यात आला आहे.
जिल्हाधिकाऱ्यांनी तोडगा काढावा
धान खरेदीसाठी सरकारी कार्यालयांचे खेटे घालून गावकरी थकले आहेत. त्यामुळे आता जिल्हाधिकाऱ्यांनीच या प्रकरणात मध्यस्थी करून लवकरात लवकर तोडगा काढावा, अशी सर्वांची भावना आहे.
बॉक्स
असे आहेत पर्याय
गोंडसावरीतील गुदाम तातडीने रिकामे करून गावकऱ्यांच्या धानाची मोजणी करावी. गावातच असलेल्या ग्रामपंचायतीच्या सभागृहात धान खरेदी करण्यात यावी. सभागृह बांधकामाचे प्रकरण न्यायप्रविष्ट असल्याने प्रकरणाचे गांभीर्य लक्षात घेता जिल्हाधिकाऱ्यांनी ही जागा वापरण्याची परवानगी द्यावी किंवा येथील जिल्हा परिषद शाळेच्या आवारात याची व्यवस्था करावी. खरेदी-विक्री संघाने सालेभाटा येथे अतिरिक्त गुदाम भाड्याने घेऊन धानाची मोजणी करावी, असे पर्याय उपलब्ध आहेत.