केशोरी : जिल्ह्यात कार्यरत मान्यताप्राप्त शिक्षकांना सेवेची सलग १२ वर्ष आणि २४ वर्ष पूर्ण केल्यानंतर वरिष्ठ वेतनश्रेणी आणि निवडश्रेणी मंजूर करण्याची प्रक्रिया मागील पाच वर्षांपासून रखडली होती. अखेर शासनाने निर्णय घेऊन विद्या प्राधिकरणाला सेवांतर्गत प्रशिक्षणाचे आयोजन करण्यासंबंधी सुचवले आहे. त्याकरिता जिल्ह्यातीेल शाळा मुख्याध्यापकांकडून माहिती मागविण्याचे काम युद्धपातळीवर सुरु आहे. त्यामुळे आता शिक्षकांना वरिष्ठ वेतनश्रेणी, निवडश्रेणी मिळण्याचा मार्ग मोकळा झाला आहे.
मागील पाच वर्षांपासून जिल्ह्यातील शासनमान्य माध्यमिक, उच्च माध्यमिक, प्राथमिक शाळेत मान्यताप्राप्त कार्यरत शिक्षकांना वरिष्ठ वेतनश्रेणी, निवडश्रेणी मंजूर करण्यासाठी पात्र असलेल्या शिक्षकांसाठी सेवांतर्गत प्रशिक्षणाची अट पूर्ण करणे बंधनकारक करण्यात आले होते. परंतु, सेवांतर्गत प्रशिक्षणाचे आजपर्यंत आयोजन करण्यात आले नव्हते. त्यामुळे जिल्ह्यातील बहुतेक शिक्षक वरिष्ठ वेतनश्रेणी, निवडश्रेणीच्या लाभापासून वंचित होते.
संबंधीत शिक्षकांचे प्रस्ताव शाळा मुख्याध्यापकांकडून वरिष्ठ लेखाधिकारी शिक्षण विभाग यांच्याकडे पाठविण्यात आले होते. परंतु त्यांना सेवांतर्गत प्रशिक्षणाची अट पुढे करुन या शिक्षकांना वरिष्ठ वेतनश्रेणी, निवड श्रेणीपासून वंचित ठेवण्यात आले होते.
त्यामुळे शिक्षकांना आर्थिक लाभ मिळाला नव्हता. आता शासनाने विद्या प्राधिकरणाला सेवांतर्गत प्रशिक्षणाचे आयोजन करण्याचे आदेश दिल्यामुळे सेवांतर्गत प्रशिक्षणासाठी पात्र असलेल्या शिक्षकांची माहिती शिक्षणाधिकाऱ्यांमार्फत शाळा मुख्याध्यापकांकडून मागविण्यात आली आहे.
त्यामुळे शिक्षकांना वरिष्ठ वेतनश्रेणी, निवडश्रेणी मिळण्याचा मार्ग मोकळा झाला असून, शिक्षकांनाही आनंद झाल्याचे दिसून येत आहे.
ज्या वर्षीपासून संबंधित शिक्षक वरिष्ठ वेतनश्रेणी किंवा निवड श्रेणीसाठी पात्र होते, त्यावर्षीपासून शिक्षकांना लाभ देण्यात यावा, अशी मागणी शिक्षक भारती शाखा, अर्जुनी मोरगावचे अध्यक्ष प्रा. दिनेश नाकाडे आणि शाखेच्या पदाधिकाऱ्यांनी केली आहे.