भोजन कंत्राटदाराने विद्यार्थ्यांना डांबले

आदिवासी शासकीय वसतिगृहातील विद्यार्थ्यांना निकृष्ट दर्जाचे भोजन देण्यात आले.

निकृष्ट भोजनाला विद्यार्थ्यांचा विरोध पोलिसांच्या मदतीने सुटका, आदिवासी वसतिगृहातील प्रकारपवनी : आदिवासी शासकीय वसतिगृहातील विद्यार्थ्यांना निकृष्ट दर्जाचे भोजन देण्यात आले. विद्यार्थ्यांनी याला विरोध केल्याने संतप्त भोजन पुरवठा ठेकेदाराने त्यांना स्वयंपाक खोलीत डांबले. हा प्रकार रविवारी रात्री घडला. सामाजिक कार्यकर्ते व पोलिसांच्या मदतीने त्यांची १२ वाजता सुटका करण्यात आली.आदिवासी विद्यार्थ्यांच्या शैक्षणिक विकासासाठी शासनाने त्यांना शिक्षणाचे दालन उघडले आहे. निवासाकरीता वसतिगृहाची व्यवस्था करण्यात आली आहे. येथील आदिवासी शासकीय वसतिगृहातील विद्यार्थ्यांना भोजन पुरवठा करण्याचे कंत्राट मोहन डोंगरे यांना देण्यात आले आहे. मात्र मागील काही दिवसांपासून तो निकृष्ट दर्जाचे भोजन विद्यार्थ्यांना देत आहे. याबाबत रविवारी सकाळी विद्यार्थ्यांनी गृहपालाला तक्रार दिली. व ठेकेदाराला विचारणा केली असता त्याने दमदाटी केल्याचा आरोप विद्यार्थ्यांनी केला आहे. दरम्यान रात्री सदर कंत्राटदाराने सकाळी उरलेला निकृष्ठ भात व भाजीपोळ्या विद्यार्थ्यांना खायला दिल्या. त्यामुळे कंत्राटदार व विद्यार्थ्यांमध्ये वाद झाला. यावेळी भोजन कंत्राटदाराने विद्यार्थ्यांना स्वयंपाक खोलीत डांबून बाहेर कुलूप लावले व त्यातून पळ काढला. याची माहिती विद्यार्थ्यांनी भ्रमणध्वनीवरून गृहपाल मेश्राम यांना दिली. मात्र त्यांनी प्रकृतीचे कारण पुढे करून वसतिगृहात आले नाही. दरम्यान प्रकरणाची माहिती गावातील काही सामाजिक कार्यकर्त्यांना मिळाली. त्यांनी पोलिसांसह वसतिगृह गाठले. यावेळी पोलिसांनी डांबलेल्या विद्यार्थ्यांना रात्री १२ वाजताचा सुमारास कुलूप तोडून बाहेर काढले. यानंतर उपाशीपोटी असलेल्या विद्यार्थ्यांना स्वयंपाक बनवून जेवण देण्यात आले. दरम्यान, प्रकल्प अधिकारी हरीराम मडावी यांनी सोमवारला वसतिगृहाला भेट दिली. यावेळी त्यांनी कंत्राटदार डोंगरे व गृहपाल मेश्राम यांना नोटीस बजावून कारवाई करण्याचे विद्यार्थ्यांना आश्वासन दिले. (शहर प्रतिनिधी)भोजन पुरवठा ठेकेदार डोंगरे यांनी जाळ तांदळाचा भात बनवून विद्यार्थ्यांना दिला. त्यामुळे विद्यार्थ्यांनी विरोध केला. त्यामुळे वाद होवून विद्यार्थ्यांनी भोजनास नकार दिल्याचा प्रकार घडला.-नितीन मेश्राम, गृहपाल