आठ दिवसात शिक्षकांचे वेतन काढणार

तालुक्यातील २३ प्राथमिक शिक्षकांचे वेतन विनाविलंब काढण्यात येईल, असे आश्वासन शिक्षणाधिकाऱ्यांनी दिले. त्यानंतर प्राथमिक शिक्षकांनी आंदोलनाची सांगता केली.

शिक्षणाधिकाऱ्यांचे आश्वासन : प्राथमिक शिक्षकांच्या आंदोलनाची सांगता
भंडारा : तालुक्यातील २३ प्राथमिक शिक्षकांचे वेतन विनाविलंब काढण्यात येईल, असे आश्वासन शिक्षणाधिकाऱ्यांनी दिले. त्यानंतर प्राथमिक शिक्षकांनी आंदोलनाची सांगता केली.
तालुक्यातील २३ प्राथमिक शिक्षकांचे माहे एप्रिल २०१४ चे वेतन प्रलंबित आहे. त्यामुळे पाल्यांचे शिक्षण कौटुंबिक आरोग्य व आर्थिक यंत्रणा अडचणीत आली आहे. प्रलंबित वेतन तातडीने अदा करण्यात यावे, यासह अन्य मागण्यांसाठी शनिवारी प्राथमिक शिक्षक संघ तालुका शाखेच्या पदाधिकाऱ्यांनी येथील पंचायत समितीसमोर धरणे आंदोलन केले.
शालार्थ वेतन प्रणालीचे कारण दाखवून निवडक २३ शिक्षकांचे माहे एप्रिल २०१४ चे वेतन अदा करण्यात आले नव्हते.
खंडविकास अधिकारी व गटशिक्षणाधिकाऱ्यांशी शिक्षक संघाने अनेकदा चर्चा केली. सदर शिक्षकांचे वेतन अदा करण्यात येत नसल्यामुळे शिक्षकांच्या पाल्यांचे शिक्षण कौटुंबिक आरोग्य व आर्थिक यंत्रणा अडचणीत आली असून शिक्षकांची मानसिक स्थिती बिघडली आहे. २३ शिक्षकांच्या प्रलंबित वेतन अदा न केल्यास प्राथमिक शिक्षक संघ तालुका शाखा भंडाराच्या पंचायत समितीचे कार्यालयासमोर उपोषण करण्याचा इशारा दिला होता. दरम्यान आंदोलनस्थळी शिक्षणाधिकाऱ्यांनी भेट देवून शिक्षकांचे वेतन विनाविलंब काढण्यात येईल, असे आश्वासन आंदोलनकर्त्यांना दिले. त्यानंतर आंदोलनाची रितसर सांगता करण्यात आली. आंदोलनात शिक्षक नेते दिलीप बावनकर, जिल्हाध्यक्ष मुबारक सय्यद, तालुकाध्यक्ष दिलीप बागडे, सरचिटणीस प्रभू तिघरे, वामन ठवकर, रमेश मदारकर, नामदेव गभणे, अशोक भुरे, प्रमोद कळंबे, सुधीर वाघमारे, श्रावण हजारे, वीरेन्द्र निंबार्ते यांच्यासह तालुक्यातील बहुसंख्य शिक्षक सहभागी झाले होते. (नगर प्रतिनिधी)