देव्हाडी उड्डाणपुलाची दिल्लीच्या पथकाकडून होणार चौकशी

पूल दोनही बाजूला दगडी आहे. दगडातून मोठ्या प्रमाणात राख वाहून गेली. सदर फ्लाय अ‍ॅश तिरोडा येथील वीज निर्मिती कारखान्यातील आहे. एका बाजुच्या अ‍ॅप्रोज पुलावर मोठे खड्डे व तळे गेले आहे. पुलात पोकळी निर्माण झाली होती. थातूरमातूर पोकळी भरण्यात आली. परंतु पुलाच्या अगदी खालच्या भागात पोकळी राहण्याची शक्यता वर्तविण्यात येत आहे.

ठळक मुद्देपुलाला गेले तडे : राख वाहून जाण्याच्या कारणांचा शोध घेणार

लोकमत न्यूज नेटवर्क
तुमसर : देव्हाडी उड्डाणपुलावरून पावसाळ्यात राख वाहून गेल्यानंतर पुलाला मोठे तडे गेले आहेत. वाहतूक सुरू झाल्यानंतर अपघाताची शक्यता बळावली आहे. बांधकाम विभागाने तांत्रिक दुरूस्तीसाठी केंद्रीय रस्ते संशोधन पथकाला चौकशी व पाहणीसाठी पाचारण केले आहे. आता दिल्ली येथील तज्ज्ञांचे पथक या उड्डाणपुलाची पाहणी करून राख वाहून जाणाऱ्या कारणांचा शोध घेणार आहे.
तुमसर-गोंदिया राष्ट्रीय महामार्गावरील देव्हाडी येथे रेल्वे क्रॉसिंगवर उड्डापुलाचे बांधकाम सुरू आहे. गत पाच वर्षांपासून कासवगतीने काम सुरू आहे. काम केव्हा पूर्ण होईल याची अद्यापही कुणी खात्री देत नाही. विशेष म्हणजे रेल्वे मंत्रालय आणि राज्य सरकार संयुक्तरित्या हा उड्डाणपूल बांधत आहे. गत तीन वर्षांपासून उड्डाणपूल भरावात फ्लाय अ‍ॅशचा उपयोग केला जात आहे. पूल दोनही बाजूला दगडी आहे. दगडातून मोठ्या प्रमाणात राख वाहून गेली. सदर फ्लाय अ‍ॅश तिरोडा येथील वीज निर्मिती कारखान्यातील आहे. एका बाजुच्या अ‍ॅप्रोज पुलावर मोठे खड्डे व तळे गेले आहे. पुलात पोकळी निर्माण झाली होती. थातूरमातूर पोकळी भरण्यात आली. परंतु पुलाच्या अगदी खालच्या भागात पोकळी राहण्याची शक्यता वर्तविण्यात येत आहे.
यापूर्वी दिल्ली येथील एका तज्ज्ञ समितीने महिनाभरापुर्वी या पुलाची पाहणी केली. परंतु नेमकी पुलात पोकळी कुठे आहे व ती तांत्रिकदृष्ट्या कशी दूर करावी, याबाबत मार्गदर्शन करण्यात असमर्थता दर्शविली. त्यामुळे आता पुन्हा बांधकाम विभागाने सीआरआय कॉन्सलिंग ऑफ सायंटिफिक इंडिस्ट्रीयल रिसर्च पथक व सेंट्रल रोड रिसर्च पथकांना बोलाविले आहे. सदर पथक मार्च महिन्यात देव्हाडी उड्डाणपुलाची पाहणी करणार आहे. तज्ज्ञांनी दिलेल्या अहवालानंतर दुरूस्ती केली जाणार आहे.

कारवाईची शक्यता
देव्हाडी उड्डाणपुलाच्या कामात हयगय झाल्याचे निदर्शनास आल्यास संबंधितावर कारवाई होण्याची शक्यता आहे. तत्ज्ञांच्या अहवालानंतर संबंधित कंत्राटदाराशी काही रक्कम राखून ठेवण्याची शक्यता आहे. सदर पूल २४ कोटींचा असून याचे काम मात्र आता येथे रखडले आहे.