चेकपोस्टमध्ये कार शिरली

पोलीस उपनिरीक्षक विवेक निशांत राऊत (३५, जवाहरनगर पोलीस ठाणे), पोलीस शिपाई निलेश श्रीकृष्ण नणीर (४०, पोलीस मुख्यालय) अशी अपघातात जखमी झालेल्यांची नावे आहेत. दोघांच्याही पायाला गंभीर दुखापत झाली असून प्रथम भंडारा व नंतर नागपूर येथील रुग्णालयात उपचारासाठी दाखल करण्यात आले. कोरोना संसर्गाच्या पार्श्वभूमीवर वाहन तपासणीसाठी राष्ट्रीय महामार्गावरील खरबी नाका येथे चेकपोस्ट तयार करण्यात आले.

ठळक मुद्देखरबी नाकाची घटना। पोलीस उपनिरीक्षकांसह दोन जण जखमी

लोकमत न्यूज नेटवर्क
जवाहरनगर : भरधाव कार अनियंत्रित होऊन चेकपोस्टच्या चौकीत शिरल्याने झालेल्या अपघातात पोलीस उपनिरीक्षकांसह दोन जण जखमी झाले. ही घटना राष्ट्रीय महामार्गावरील भंडारा तालुक्यातील खरबी नाका येथे शनिवारी सकाळी ७ वाजता घडली. या अपघातात आरोग्य व पोलीस कर्मचारी थोडक्यात बचावले.
पोलीस उपनिरीक्षक विवेक निशांत राऊत (३५, जवाहरनगर पोलीस ठाणे), पोलीस शिपाई निलेश श्रीकृष्ण नणीर (४०, पोलीस मुख्यालय) अशी अपघातात जखमी झालेल्यांची नावे आहेत. दोघांच्याही पायाला गंभीर दुखापत झाली असून प्रथम भंडारा व नंतर नागपूर येथील रुग्णालयात उपचारासाठी दाखल करण्यात आले. कोरोना संसर्गाच्या पार्श्वभूमीवर वाहन तपासणीसाठी राष्ट्रीय महामार्गावरील खरबी नाका येथे चेकपोस्ट तयार करण्यात आले. शनिवारी सकाळी मौदा येथून भरधाव कार (क्रमांक एमएच २७ एसी १२३१) खरबी चेकपोस्टजवळ आली. त्यावेळी पोलिसांनी कारला थांबण्याचा इशारा केला. मात्र अचानक कार अनियंत्रित होऊन तेथे उभारलेल्या पोलीस चौकीला धडक देऊन लगत असलेल्या नालीत जाऊन थांबली. या अपघातात विवेक राऊत आणि निलेश नणीर यांच्या पायावरून कार केल्याने त्यांना गंभीर दुखापत झाली. यामुळे एकच खळबळ उडाली. तात्काळ दोघांनाही भंडारा येथील रुग्णालयात उपचारासाठी दाखल करण्यात आले. त्यानंतर अधिक उपचारासाठी नागपूर येथे रवाना करण्यात आले.

आयुध निर्माणी कर्मचाऱ्याची कार
चेकपोस्टवरील चौकीला धडक देऊन दोन पोलिसांना जखमी करणारी सदर कार जवाहरनगर येथील आयुध निर्माणी कर्मचारी संतोष यावलकर यांच्या मालकीची आहे. ते काही कामानिमित्त मौदा येथे गेले होते. शनिवारी सकाळी जवाहरनगरकडे येत होते. सदर कार बाल्या जांभूळकर रा.परसोडी हा चालवित होता. नेमके ते मौदा येथे कशासाठी गेले आणि कार अचानक अनियंत्रित कशी झाली असा प्रश्न निर्माण झाला आहे. या अपघाताची माहिती मिळताच वरिष्ठ पोलीस अधिकाऱ्यांसह जवाहरनगरचे पोलीस घटनास्थळी दाखल झाले. या अपघातानंतर या चेकपोस्टवरील कामकाज काही काळ खोळंबले होते. या ठिकाणी असलेले वैद्यकीय कर्मचारी आणि इतर पोलीस अपघातातून थोडक्यात बचावले.