भरदिवसा तरुणाचा निर्घृण खून

सुरजचा मृतदेह रस्त्यालगतच्या नालीत पडून होता. शहर पोलिसांना याची माहिती देण्यात आली. ठाणेदार लोकेश कानसे आपल्या ताफयासह घटनास्थळी दाखल झाले. पोलिसांनी मृतदेह ताब्यात घेत शवविच्छेदनासाठी रुग्णालयात रवाना केला.

ठळक मुद्देशुक्रवारीतील थरार : मानेवर आणि पोटावर धारदार शस्त्राचे वार

लोकमत न्यूज नेटवर्क
भंडारा : धारदार शस्त्राने मानेवर आणि पोटावर वार करुन एका तरुणाचा भरदिवसा निर्घृण खून करण्याची घटना येथील गजबजलेल्या शुक्रवारी परिसरात सोमवारी दुपारी ३.३० वाजताच्या सुमारास घडली. खून कोणत्या कारणाने झाला हे तुर्तास कळू शकले नाही. पोलीस आरोपींचा शोध घेत आहे. अवघ्या १५ दिवसात शहरात खून होण्याची ही दुसरी घटना होय.
सुरज परमाल यादव (२५) रा. किसान चौक भंडारा असे मृताचे नाव आहे. सोमवारी दुपारी २.३० वाजताच्या सुमारास सुरज आपल्या मोटारसायकलने जात असताना दोन ते तीनच्या संख्येने असलेल्या मारेकऱ्यांनी त्याच्यावर अचानक हल्ला केला. मानेवर आणि पोटावर सपासप वार केल्याने काही क्षणातच तो खाली कोसळला आणि जागीच ठार झाला. भरदिवसा झालेल्या या खुनाने संपूर्ण शहरात एकच खळबळ उडाली.
या घटनेची माहिती होताच बघ्यांची घटनास्थळी मोठी गर्दी झाली. सुरजचा मृतदेह रस्त्यालगतच्या नालीत पडून होता. शहर पोलिसांना याची माहिती देण्यात आली. ठाणेदार लोकेश कानसे आपल्या ताफयासह घटनास्थळी दाखल झाले. पोलिसांनी मृतदेह ताब्यात घेत शवविच्छेदनासाठी रुग्णालयात रवाना केला.
घटनास्थळाला उपविभागीय पोलीस अधिकारी रिना जनबंधू यांनी भेट दिली. अधिक तपास सहायक पोलीस निरीक्षक स्वप्नील नेवसे यांच्या मार्गदर्शनात करण्यात येत आहे.
भरदिवसा खून करुन आरोपी पसार झाले. वृत्तलिहीस्तोवर त्यांचा थांगपत्ता लागला नव्हता. स्थानिक शहर ठाण्याचे डीबी पथक आरोपींचा शोध घेत होते. आरोपींच्या अटकेनंतरच खूनाचे कारण पुढे येणार आहे. सुरज हा मुळचा नागपूर लगतच्या हिंगणा येथील रहिवासी असून तो आपल्या पत्नी व मुलासह किसान चौकात भाड्याचे घर घेवून राहत होता. रोज मजुरी करुन तो चरितार्थ चालवित होता. सुरजची पत्नी नागपूर येथे काही कामानिमित्त गेली होती. सायंकाळपर्यंत ती भंडारात पोहोचली नव्हती. या घटनेने शहरात एकच खळबळ उडाली आहे.

भंडारात गुन्हेगारीने डोके वर काढले
शांत शहर म्हणून ओळखल्या जाणाऱ्या भंडारा शहरात गुन्हेगारीने डोके वर काढल्याचे अलिकडील काही घटनांवरुन दिसून येत आहे. मोटारसायकलचा कट मारण्याच्या कारणावरुन १९ जून रोजी सरफराज कासम शेख (१८) या तरुणाचा भंडारातील डॉ. हेडगेवार चौकात खून करण्यात आला होता. या घटनेची शाई वाळत नाही तोच सोमवारी भर दिवसा सुरज यादवचा खून करण्यात आला. लॉकडाऊनच्या काळात सर्वत्र पोलिसांची करडी नजर असतानाही पंधरा दिवसात दोन खून झाल्याने भंडारा पोलिसांचा वचक संपला की काय? अशी शंका येत आहे.